Беларусь у студзені-маі павялічыла экспарт тавараў і паслуг на 32,7 працэнта, да $18 млрд

13.07.2021

Беларусь у студзені - маі 2021 года павялічыла экспарт тавараў і паслуг у параўнанні з аналагічным перыядам 2020-га на 32,7 працэнта, да $18,066 млрд. Аб гэтым сведчаць даныя, апублікаваныя на сайце Нацыянальнага банка, паведамляе БЕЛТА.

Знешнегандлёвы абарот тавараў і паслуг за пяць месяцаў склаў $34,885 млрд, што на 30,7 працэнта больш, чым за аналагічны перыяд 2020 года. У тым ліку імпарт склаў $16,818 млрд (рост на 28,7 працэнта). Дадатнае сальда знешняга гандлю таварамі і паслугамі склалася на ўзроўні $1,247 млрд (у студзені - маі 2020-га сальда таксама было дадатным - $548,1 млн).

Знешнегандлёвы абарот тавараў вырас на 34,4 працэнта, да $28,775 млрд. Экспарт тавараў павялічыўся на 38,9 працэнта, да $14,16 млрд, імпарт - на 30,4 працэнта, да $14,615 млрд. Сальда склалася адмоўным у памеры $455,5 млн (у студзені - маі 2020 года яно таксама было адмоўным і складала $1,007 млрд).

Знешнегандлёвы абарот паслуг вырас на 15,7 працэнта, да $6,109 млрд. Экспарт паслуг павялічыўся на 14,3 працэнта, да $3,906 млрд, імпарт - на 18,3 працэнта, да $2,203 млрд. Сальда знешняга гандлю паслугамі склалася дадатным у памеры $1,703 млрд (у студзені - маі 2020 года дадатнае сальда складала $1,555 млрд).

БелТА