На старце праекта
Для паляпшэння транспартна-эксплуатацыйнага стану аўтамабільных дарог рэалізуецца дзяржаўная праграма «Дарогі Беларусі» на 2021-2025 гады. І адзін з праектаў, уключаных у яе падпраграму «Рэспубліканскія аўтамабільныя дарогі», мае самае непасрэднае дачыненне да Полацкага раёна. Гэта рэканструкцыя аўтадарогі Р-46 Лепель-Полацк-мяжа Расійскай Федэрацыі (Юховічы) на ўчастку Лепель-Полацк з абходам г.Полацка. І падрыхтоўка да работ, якія адбудуцца на ўчастку Полацк–Сарочына (км 31.900–км 61.500), стартавала.
Што трэба зрабіць, якія задачы вырашаюцца цяпер і пра што трэба ведаць жыхарам нашага рэгіёну — пра гэта мы паразмаўлялі з першым намеснікам старшыні Полацкага райвыканкама Сяргеем Лейчанкам.
Крыніцы
Крыніцамі фінансавання гэтага дарагога праекта — а кошт будаўніцтва другой чаргі па каштарысе ў цэнах на жнівень 2022 года (інф. БЕЛТА) складала Br157,9 млн., на дату заканчэння будаўніцтва - больш як Br179,8 млн. - з'яўляюцца сродкі рэспубліканскага бюджэту, Банка развіцця Рэспублікі Беларусь і дарожнага фонду.
Што, дзе, калі
— Сяргей Дзмітрыевіч, наша газета ўжо інфармавала чытачоў аб арганізацыі аб'язнога маршруту на час рэканструкцыі. Якія працы і ў якія тэрміны належыць для гэтага выканаць?
— Вырашэнне пытанняў фінансавання дазваляе ў сакавіку пачаць рэалізацыю гэтага праекта. Будуць мяняцца схемы, маршруты аўтатранспарту, у тым ліку пасажырскага, будзе пракладацца часовая аб'язная дарога. Для таго каб перанакіраваць рух на нашым участку, трэба будзе на працягу 10 км адрамантаваць аб'езд ад аг. Гомель да выезду на Р-46 праз в.Суя, правесці рэканструкцыю моста ў в. Туржэц з яго пашырэннем і адрамантаваць мост у раёне аздараўленчых лагераў на Суе. Дарогу, якая ідзе праз лес, варта пашырыць і пакласці там новае асфальтабетоннае пакрыццё.
Актыўныя працы па падрыхтоўцы аб'язнога маршруту пачнуцца з 1 сакавіка. І, згодна з планам, ён павінен быць гатовы праз чатыры месяцы. Тады будзе закрывацца асноўная дарога, памяняюцца схемы руху транспарту, графікі руху аўтобусаў на прыгарадных пасажырскіх перавозках Аўтобуснага парка №2 г.Полацка.
Лічбы
Па падліках спецыялістаў, для рамонтных работ трэба завезці больш за 500 тысяч куб. м пяску. І толькі ў 2023 годзе трэба пакласці каля 100 тысяч тон асфальту на аб'язныя дарогі.
У працэсе
— Раскажыце, калі ласка, як прасоўваецца падрыхтоўка да гэтай маштабнай будоўлі.
— Шэраг арганізацыйных пытанняў ужо вырашаецца. Праводзяцца штабы, задзейнічаны спецыялісты самых розных служб і ведамстваў. Леснікі, землеўпарадчыкі, дарожнікі, прадстаўнікі Дзяржаўтаінспекцыі, Аўтапарка прайшлі і аб'ехалі многія ўчасткі дарогі. Вывучаны пад'езды, магчымасці скіду руху.
Падчас падрыхтоўкі выканана геолагаразведка, адведзены кар'еры для здабычы пясчана-жвіровай сумесі, ДСУ №2 г.Полацка набыты яшчэ адзін асфальтавы завод, які прайшоў абкатку ў мінулым сезоне. Завершаны працэс маркіроўкі, забіты дарожныя тычкі - як на асноўнай, так і на аб'язной дарогах. Ідзе афармленне неабходнай дакументацыі, заключаюцца дагаворы, абмяркоўваецца, як гарантаваць бяспеку на час работы дзіцячых аздараўленчых лагераў…
Усё гэта незаўважная для большасці дзейнасць, якая папярэднічае асноўным працам.
З улікам сітуацыі
— Трэба разумець, што пэўныя нязручнасці для жыхароў шэрагу населеных пунктаў, у ліку якіх Канашы, Варонічы, Заскоркі, аграгарадок Заазер'е, непазбежныя…
— Будаўнічыя работы будуць забяспечвацца пяском з некалькіх кар'ераў — у вёсках Сарочына, Канашы і двух новых — у раёне Туроўлі і Мяжно. Аб'ёмы грунта трэба будзе перавезці значныя. А людзі не заўсёды ўспрымаюць з разуменнем неабходнасць руху грузавых машын па населеных пунктах.Тут жа адзначу, што асфальтавая дарога ад в.Канашы да в.Варонічы будзе адрамантавана, як і ўчасткі дарогі ад в.Заскоркі да аг.Гомель. А пасля заканчэння работ гэтыя дарогі зноў агледзяць на прадмет неабходнасці іх аднаўлення.
Максімальна хутка і якасна
— Сяргей Дзмітрыевіч, абноўленая дарога Р-46 будзе больш камфартабельная?
- Так. Гэта двухпалосная дарога з шырынёй паласы 3,5 м, асфальтаванымі абочынамі па 1,5 м кожная. Увогуле будучая дарога стане шырэйшай за існуючую ў асфальце на 4 м.
Трэба выканаць велізарны аб'ём будаўнічых работ па пашырэнні абочын, прыладзе развязкі, прыпыначных пунктаў і шматлікае іншае. Вядома, мы зацікаўлены, каб дарога была гатова як мага хутчэй, але разам з тым яна павінна быць максімальна якаснай. Рэканструкцыя прадугледжвае давядзенне геаметрычных параметраў аўтадарогі Р-46 да нарматыўных значэнняў II катэгорыі, мяркуецца, што яе характарыстыкі дазволяць перагледзець хуткасныя рэжымы, павысіць узровень бяспекі ўдзельнікаў дарожнага руху.
Намі прадугледжана, каб і пасля завяршэння будаўніцтва асобныя ўчасткі аб'язной дарогі засталіся людзям у пастаяннае карыстанне, служылі для іх патрэб, як і адрамантаваныя масты.
Адназначна, варта набрацца цярпення і перажыць часовыя нязручнасці.
Другая чарга
Рэканструкцыя аўтадарогі Р-46 дазволіць павялічыць яе прапускную здольнасць, знізіць паліўна-энергетычныя і часовыя выдаткі.
На здымках: паварот на будучую аб'язную дарогу; мост у раёне аздараўленчых лагераў на Суі.
