Клапатлівыя актывісты акружылі ўвагай шматдзетную сям'ю Полацкага раёна, якая пражывае ў в. Бельчыцы.
«Хочацца выказаць падзяку нашым партнёрам з горада-пабраціма Фрыдрыхсхафена за аказаную дапамогу ў набыцці падарункаў, — адзначыла лідар раённай арганізацыі жанчын Аліна Шчукіна. - Дзякуй вялікі і ўдзельнікам нашага сумеснага навагодняга дэсанту»
Убачыўшы Дзеда Мароза ў двары дома, дзеці сям'і Малюк дружна выбеглі яго сустракаць. Госці прывезлі прысмакі, а таксама цацкі. «Сельвыканкам нас кожны год віншуе. Дзякуй жансавету, што не абышлі ўвагай», — дзякавала шматдзетная мама Аксана Малюк. Святы тут сустракаюць у сямейным коле ў сваім вялікім доме. Усе рыхтуюцца актыўна, дзеці прывучаны да працы. На падворку — чатыры каровы, свінні, куры. Ёсць немалы ўчастак зямлі, трактар для яе апрацоўкі. «Малочныя прадукты не купляем, гародніны стараемся нарыхтаваць празапас», - распавядае гаспадыня дома. Яны з мужам прывыклі заўсёды і ва ўсім разлічваць на сябе, іх бацькі пажылыя, жывуць у Глыбоцкім раёне. Настрой ва ўсіх быў перадсвяточны, і пажаданні агульныя: каб ніхто не хварэў і канікулы праходзілі весела.
Разам з жансаветам па загадзя спланаваным маршруце адправіліся і супрацоўнікі полацкіх ГРАНС і РАУС, старшыня Экіманскага сельвыканкама Таццяна Скрыган. Апранутага ў касцюм Дзеда Мароза міліцыянера і актыўных грамадзяніц радасна сустракалі дарослыя і дзеці. Падлеткі чыталі вершы і выконвалі песні, цёплымі віншаваннямі былі расчуленыя да слёз адзінокія бабулі. Вяскоўцы таксама сталі ўдзельнікамі акцыі «Бяспечны Новы год» Полацкага ГРАНС.
Крыніца: pvestnik.by