Андрэю Мікалаевічу пашчасціла адразу пасля школы выбраць правільны шлях. Прытрымліваючыся яго, ён паспяхова рэалізаваў сябе ў важнай цікавай справе. І, ужо будучы вопытным прафесіяналам, заслужыў высокую ацэнку сваёй працы.
…У 1992 годзе Андрэй уладкаваўся на Полацкую ЦЭЦ, дзе шмат гадоў працавала і яго маці, Ніна Сцяпанаўна. Вучыцца вырашыў завочна.
«Не гуманітарый»
- Я дакладна не гуманітарый, мяне больш тэхніка прыцягвае, - тлумачыць ён. -У школе фізіка падабалася, педагог у нас быў выдатны - Ларыса Іларыёнаўна Сталярова... На ЦЭЦ мяне прынялі слесарам, а праз паўгода, пасля заканчэння курсаў у Віцебску, перавялі машыністам катлоў. Працягваючы працаваць, завочна ў тэхнікуме атрымаў спецыяльнасць «тэхнік-цеплатэхнік».
Пасля службы ў войску Андрэй Лонь вярнуўся на сваё працоўнае месца. «У той час у нас працягваўся перавод катлоў на прыродны газ, ішла мадэрнізацыя, — успамінае ён. — Працаваў, набіраўся досведу». У 2008 годзе кіраўніцтва прадпрыемства прызначыла кемлiвага машыніста катлоў старшым машыністам катлатурбіннага цэха. А яшчэ праз год ён атрымаў новае прызначэнне - начальнік змены электрастанцыі.
«Усюды свае нюансы»
— Гэта ўжо іншая праца, вялікая зона адказнасці, людзей у падпарадкаванні дадалося, — разважае наш суразмоўца. - Вывучаў асноўныя тэхналагічныя схемы, інструкцыі, правілы і іншыя тэхнічныя нарматыўна-прававыя акты, якія рэгламентуюць нашу дзейнасць. Складана сказаць, дзе складаней - з людзьмі ці з тэхнікай. Усюды свае нюансы. На кожным працоўным месцы трэба вучыцца. Сваім настаўнікам лічу начальніка змены Дзмітрыя Іванавіча Пракапенкава, які падказваў, падстаўляў плячо. І кіраўніцтва цеплаэлектрацэнтралі - дырэктар Полацкай ЦЭЦ, галоўны інжынер - дапамагае прымаць рашэнні па пытаннях цеплазабеспячэння горада.
«Усіх энергетыкаў аб'ядноўвае асаблiва адказнае стаўленне да працы, - лічыць Андрэй Лонь. — І разуменне, што ад нашай працы, нашых дзеянняў напрамую залежыць дабрабыт многіх».
…І творчы падыход
Кожны новы працоўны дзень у Андрэя Мікалаевіча пачынаецца з прыёмкі змены і працягваецца выкананнем непасрэдных абавязкаў. А гэта вядзенне эканамічнага рэжыму работы абсталявання, выдача дазволаў на правядзенне работ, кантроль паказчыкаў цепласеткі, правільнасці і шпаркасці дзеянняў аператыўнага персаналу і выкананне шэрагу іншых задач. Набытыя досвед, кампетэнтнасць і творчы падыход да справы, а таксама надзейнае плячо калег дазваляюць паспяхова спраўляцца з працай.
«Манатоннасць і руціна — не маё»
— Каб адбыцца ў нашай прафесіі, трэба быць стрэсаўстойлівым, разважлівым. Спачатку думаць, затым рабіць, - упэўнены Андрэй Мікалаевіч. - А яшчэ трэба, каб самому было цікава. Тады ўсяму навучышся і ўсё атрымаецца. Мне падабаецца, што тут кожны дзень не падобны на папярэднi. Манатоннасць і руціна - не маё. Люблю энергічны рытм, рух. А рух - гэта жыццё.
Можа, таму, нараўне з такім спакойным хобі, як рыбалка, ёсць у Андрэя і актыўныя захапленні — плаванне ў басейне, язда на веласiпедзе. Проста могуць з жонкай Алесяй Віктараўнай, якая працуе ў сферы медыцыны, пасля працы адправіцца на веласіпедную прагулку. Сыны Аляксандр і Уладзіслаў ужо дарослыя, старэйшы сябе рэалізуе ў творчай сферы, малодшы вучыцца ў каледжы.
…І сваім хлапчукам, і моладзі, якая прыходзіць на змену старэйшаму пакаленню работнікаў Полацкай ЦЭЦ, Андрэй Мікалаевіч жадае не стаяць на месцы, удасканальвацца, вучыцца — усюды і заўсёды.
БЛІЦАПЫТАННЕ
— За што ўдзячныя бацькам?
— За ўсё. Разумею, што маці заўсёды правільныя рэчы мне казала. Трэба прыслухоўвацца да іх парад. А бацькам трэба дзяліцца з дзецьмі сваім меркаваннем, бачаннем той ці іншай сітуацыі, але ні ў якім разе не настойваць на сваім.
— Прысутнічаеце ў сацыяльных сетках?
— Не. І ў камп'ютарныя гульні не гуляю. Мне гэта не цікава. Вольны час аддаю перавагу праводзіць з сям'ёй.
— Які Ваш любімы фільм?
— «Дастукацца да нябёсаў». Моцны фільм.
- Любімае месца ў горадзе - гэта ...
- Напэўна, вуліца Ніжне-Пакроўская. Любiм тамака на веласiпедах пракаціцца. Хачу адзначыць, што інфраструктура для веласіпедыстаў у Полацку паціху развіваецца. Толькі трэба было б больш увагі безбар'ернаму асяроддзю ўдзяліць.
- Ваша мара…
- Адправіцца ў падарожжа. Хацелася б пабываць у Іспаніі — Барселоне, Севільі. І па Беларусі паездзіць, яшчэ шмат цікавага не бачылі.
На здымку: электраманцёр па абслугоўванні электраабсталявання электрастанцыі Сяргей Смыкаў і начальнік змены электрастанцыі Андрэй Лонь.
Крыніца: pvestnik.by
