Справы жыллёвыя
Наконт рамонту дома №23 па вуліцы Шміта на прыём да кіраўніка раёна прыйшлі адразу некалькі яго жыхароў (на фота). Аб'ект знаходзіцца на кантролі і ўнесены ў графік капрамонту жыллёвага фонду на бягучы год. Як растлумачыў першы намеснік старшыні райвыканкама Сяргей Лейчанка, праектна-каштарысная дакументацыя цяпер праходзіць дзяржаўную экспертызу. Работы пачнуцца ўжо ў чацвёртым квартале. Пытанне рамонту жылфонду закранула і жыхарка аг. Жарнасекі, якая прасіла звярнуць увагу на дом №16 па вул. Маладзёжнай. Зварот будзе вывучаны падчас камісійнага абследавання, па выніку якога будзе складзены перспектыўны план рамонту жылфонду.
Жыллёвыя пытанні найбольш часта гучаць падчас асабістых прыёмаў. Так, патрэбную кансультацыю пры размове з кіраўніцтвам раёна атрымала і жыхарка аднаго з інтэрнатаў. Палачанка з прычыны абставінаў вымушана была пакінуць працу на прадпрыемстве, якое прадаставіла месца жыхарства. Яна працаўладкавалася ў іншую арганізацыю. Цяпер новы ўласнік інтэрната перазаключае дагаворы. Грамадзянцы параілі атрымаць хадайніцтва ад працадаўцы, каб захаваць месца ў інтэрнаце.
…і дарожныя
Падчас прыёму грамадзян было ўзнята пытанне стану дарожнага пакрыцця на ўездзе ў в.Фарынава і некаторых вуліцах гэтага населенага пункта, а таксама дарогі ў напрамку да аг.Рудня. Праблемныя ўчасткі - на кантролі, у бліжэйшы час прадугледжана выкананне дарожных работ.
Падчас сустрэчы з жыхарамі рэгіёна абазначана неабходнасць рамонту ўчастка дарогі ў Полацку па вул. Нікіціна, добраўпарадкавання прыдамавых тэрыторый на вул. Кутні, 1, а таксама ў в. Салонікі. Дадзены даручэнні датычным службам яшчэ раз уважліва вывучыць сітуацыю.
Жыхары Полаччыны таксама закраналі пытанні, якія тычацца працы камісійнай крамы, водаадвядзення з вуліц Бялінскага і Будзёнага, арэнды зямельнага ўчастка. «Людзі прыходзяць да нас па дапамогу, таму важна кампетэнтна і даступна растлумачыць ім усе нюансы. І, вядома, максімальна аператыўна вырашыць праблемныя сітуацыі згодна з патрабаваннямі заканадаўства», — падвёў вынік Ігар Марковіч.
Кіраўнік раёна звярнуў увагу заяўнікаў, што заўсёды вітаецца ініцыятыва мясцовых жыхароў. Прыклад - калектыўная праца жыхароў вул. Армейскай,2 у г.п. Ветрына па навядзенні парадку і ўтульнасці ва ўласным двары, які прызнаны летась лепшым у раённым конкурсе па добраўпарадкаванні. У якасці прыза тут зроблены рамонт дваровай тэрыторыі за кошт сродкаў раённага бюджэту.
Фота Святланы ЧАРКОЎСКАЙ.
Крыніца: pvestnik.by
