Змяніўся парадак прыёму экзаменаў на права кіравання механічным транспартным сродкам (Відэа)
Для камфорту экзаменуемых, а таксама выключэння канфліктных і спрэчных сітуацый, прадугледжана вядзенне не толькі відэа-, але і аўдыёзапісу здачы кваліфікацыйных экзаменаў.
Таксама адменены тэрмін дзеяння тэарэтычнага кваліфікацыйнага іспыту і зменены тэрміны здачы этапаў практычнага кваліфікацыйнага іспыту на права кіравання механічным транспартным сродкам.
Вызначана, што асоба, якая здала тэарэтычны экзамен, дапускаецца да здачы практычнага экзамену. Пры прызначэнні практычнага іспыту не ўлічваецца колькасць спроб і не абмяжоўваецца тэрмін для магчымасці яго здачы (раней тэрмін быў абмежаваны 6 месяцамі дзеяння тэарэтычнага іспыту). Паўторна тэарэтычны і практычны іспыт прызначаюцца не раней чым праз дзесяць дзён са дня, наступнага за днём апошняга іспыту.
Нагадаем, што практычны іспыт на вучэбным аўтамабілі прымаецца ў два этапы: першы этап - на аўтадроме (закрытай пляцоўцы) і другі - на маршруце ва ўмовах рэальнага дарожнага руху. Здача ўсіх этапаў практычнага іспыту ажыццяўляецца толькі ў адным рэгістрацыйна-экзаменацыйным падраздзяленні.
Скарэктаваны некаторыя ўмовы, пры якіх практычны іспыт лічыцца не здадзеным, напрыклад, пры прыпынку рухавіка; пачатку руху без разблакіроўкі стаяначнай тармазной сістэмы, а таксама невыкарыстанні рамяня бяспекі.
У сувязі з увядзеннем у эксплуатацыю новай аўтаматызаванай інфармацыйнай сістэмы ДАІ і выкарыстаннем планшэтных камп'ютараў, якія даюць магчымасць у рэжыме рэальнага часу ўносіць адзнакі аб выніках здачы экзаменаў, адмяняецца выкарыстанне экзаменацыйных картак на папяровым носьбіце па тэарэтычным і практычным кваліфікацыйных экзаменах.
Экзаменацыйныя падраздзяленні ДАІ гатовы да работы ў адпаведнасці з новым патрабаванням. Жадаем усім паспяховай здачы экзаменаў.
Інфармацыя Міністэрства ўнутраных спраў Рэспублікі Беларусь
Крыніца: pvestnik.by
