«Сёння першы дзень работы грамадскай прыёмнай. Лічу, што гэта вельмі важная форма працы Савета Рэспублікі. На працягу ўсяго сёмага склікання мы надавалі і працягваем надаваць увагу працы з грамадзянамі, працоўнымі калектывамі. Прыёмы ў Мінску праводзім па графіку, але зараз у грамадзян нашай краіны будзе магчымасць штодня звяртацца ў Савет Рэспублікі са сваімі пытаннямі, праблемамі, прапановамі, — сказаў Сяргей Рачкоў. - Мы гатовы ў першую чаргу адказваць на тыя праблемныя сітуацыі, якія ўзнікаюць у людзей. Вельмі важна, калі сенатары ўмешваюцца ў такія сітуацыі. Па нашых дадзеных, каля 60% пытанняў, з якімі прыходзяць да нас грамадзяне, павінны вырашацца на мясцовым узроўні мясцовымі органамі ўлады. Незалежна ад таго, ці прыйдуць людзі з пытаннямі па праекце Канстытуцыі або са сваімі жыццёвымі праблемамі, мы павінны разглядаць усе сітуацыі, якія хвалююць нашых людзей».
Па словах Сяргея Рачкова, грамадзян турбуе многае. Так, жыхарка Мiнска звярнулася з бытавой праблемай і ўнесла прапанову ў закон «Аб абароне правоў спажыўцоў жыллёва-камунальных паслуг». «Я ўбачыў, што жанчына цікавіцца палітычнымі падзеямі, ведае аб абнаўленні Канстытуцыі і маючым адбыцца рэферэндуме. Важна, што грамадзянка прыйшла з канструктыўнай прапановай, якім чынам можна ўрэгуляваць сітуацыю, у якой яна апынулася», - звярнуў увагу парламентарый.
З больш чым 20 прапановамі на прыём прыйшоў пенсіянер, які дасканала вывучыў апублікаваны праект змяненняў і дапаўненняў у Канстытуцыю. «Кожны мае права на сваё меркаванне. Я ўжо ў самавітым узросце і мог бы не займацца гэтым пытаннем, але лічу, што нашым дзецям і ўнукам, усёй краіне жыць трэба ўсё-ткі лепш. Дакумент сур'ёзны, і варта выказаць свае прапановы. Лічу, што змены і дапаўненні ў праект Канстытуцыі маюць права на існаванне і нейкіх прынцыповых пярэчанняў супраць іх няма», - лічыць мужчына.
«Мы працягнем актыўна працаваць у грамадскай прыёмнай, прымаць абсалютна ўсіх грамадзян з любымі пытаннямі, з якімі да нас прыйдуць. Мы і раней сустракаліся ў працоўных калектывах і закраналі тэму маючага адбыцца рэферэндуму, абнаўлення Асноўнага закона. Калі раней у цэлым гэта былі агульныя тэмы, то цяпер, калі апублікавана новая рэдакцыя, людзі пачынаюць задаваць больш прадметныя і канкрэтныя пытанні. Так, у раздзеле, прысвечаным Усебеларускаму народнаму сходу, людзей хвалюе, як будуць пераразмяркоўвацца ўладныя паўнамоцтвы паміж органамі дзяржаўнай улады. Тут адбываецца дыскусія і тлумачэнне, людзі выказваюць свае пункты гледжання, пэўныя асцярогі, падтрымку такога рашэння. Мы фіксуем усе прапановы па праекце Канстытуцыі, праводзім абмеркаванне або адразу адказваем на нейкія пытанні. Далей усё будзе сістэматызавацца і перадавацца для ўліку меркавання грамадзян па праекце Канстытуцыі» — адзначыў Сяргей Рачкоў.
Як падкрэсліў парламентарый, мы самі стварылі сваю дзяржаву і не павінны дазволіць нікому, ні ўнутраным, ні тым больш знешнім дэструктыўным сілам, разбурыць нашу дзяржаўнасць. «Таму Прэзідэнт вынес на разгляд усяго беларускага народа пытанне па абнаўленні Канстытуцыі. Гэта асноўны закон нашага жыцця, які будзе спрыяць развіццю і ўмацаванню нашай дзяржавы», - упэўнены ён.
