Супрацоўнікі АСВОД з асцярогай чакалі гэтых выхадных. Маразы трохі прыхапілі паверхню вадаёмаў, але месцамі лёд недастаткова моцны. Таўшчыня каля 5 см - гэта вельмі рызыкоўна. А любая змена надвор'я ператворыць азёры і рэкі ў ледзяныя пасткі.
Вячаслаў Горын, начальнік вадалазна-ратавальнай службы Віцебскай абласной арганізацыі АСВОД: «Плюсавыя тэмпературы, аж да дажджоў, і як толькі на лёдзе з'яўляецца вада, то трываласць лёду будзе змяншацца практычна ў два разы. Выходзіць на гэты лёд будзе вельмі небяспечна, гэта значыць фактычна гарантавана здарэнне, гібель або пераахаладжэнне - 100%-ная гарантыя».
10-15 хвілін у халоднай вадзе - і наступствы для рыбака будуць незваротнымі. Пакуль выбаўляе толькі людская дапамога: супрацоўнікі АСВОД і відавочцы выратавалі ўжо пецярых. Але не ўсім так пашанцавала: у Гарадоцкім раёне і ў Ветцы на Гомельшчыне патанулі два пенсіянеры.
