На жаль, статыстыка паказвае, што колькасць бытавых траўм, атрыманых непаўналетнімі, з году ў год не памяншаецца. Больш за тое, лічбы сведчаць аб тым, што часцей за ўсё траўміраванне дзяцей адбываецца ў сям'і — непасрэдна дома або падчас прагулак. Вядома, ні адзін бацька не жадае свайму дзіцяці дрэннага. Тады чаму ж складваецца такая сітуацыя?
- Асноўнай прычынай большасці траўм з'яўляецца незабеспячэнне бацькамі надгляду і вольнага часу дзяцей — распавядае Аляксандра Каваленка, фельчар Кабінета здаровага дзіцяці Полацкай дзіцячай паліклінікі. - Яны не навучаюць малых правілам бяспечных паводзін дома (напрыклад, як правільна карыстацца відэльцам, нажом, запалкамі і інш.). Сучасныя дзеці перасталі актыўна займацца спортам, гуляць у рухомыя гульні на вуліцы - у выніку яны паслаблены фізічна, не ўмеюць абыходзіцца з мячом. У дамах часцяком адсутнічаюць такія сродкі бяспекі, як ахоўныя экраны на батарэю, амартызатары захлопвання дзвярэй, блакатары адчынення вокнаў («дзіцячы замок») і дзвярэй шаф, шуфляд, заглушкі ў разеткі, мяккія куты на мэблю.
Аляксандра Фёдараўна адзначае, што ў кожнага сезона ёсць спецыфічныя траўмы. Так, для гэтага зімовага перыяду характэрны ўдары і пераломы. Большасць з іх дзеці атрымліваюць, катаючыся на цюбінгах або паслізнуўшыся ў галалёд.
- Катацца на цюбінгах можна толькі ў адведзеных для гэтага месцах, у спецыяльных сродках абароны (шлеме), строга выконваючы інструкцыю па эксплуатацыі — папярэджвае спецыяліст паліклінікі. - Купляючы такую цацку, дарослыя павінны разумець небяспеку, якая ўтойваецца ў ёй. Каб прадухіліць падзенне дзяцей у галалёд, па-першае, варта апранаць ім абутак, якая адпавядае сезону (падэшва ў зімовым абутку цяплей і робіцца з няслізгальных матэрыялаў). Па-другое, вучыць правільна перасоўвацца ў гэтых умовах: не бегчы, не рабіць шырокіх крокаў, пры падзенні старацца, згрупаваўшыся, зваліцца не на спіну, а на бок.
Так, адказнасць бацькоў за бяспеку дзяцей замацавана дзяржавай у ч. 3 арт. 32 Канстытуцыі Рэспублікі Беларусь, а таксама ў арт. 67 Кодэкса аб шлюбе і сям'і. Але, пагадзіцеся, у першую чаргу тут вельмі важная адказнасць перад самімі дзецьмі, бо па віне нядбайных і бестурботных бацькоў дзіця можа на ўсё жыццё застацца інвалідам. Дарослыя, памятайце пра гэта!
