Дзяржаўная палітыка Рэспублікі Беларусь у галіне правоў інвалідаў і іх сацыяльнай інтэграцыі выяўляецца, перш за ўсё, у стварэнні прававых, эканамічных і сацыяльных умоў для поўнага забеспячэння абароны правоў інвалідаў. І самы важны момант - іх інтэграцыя ў грамадстве. Яе асноўнымі прынцыпамі з'яўляюцца роўнасць і захаванне правоў і свабод чалавека, забеспячэнне роўных магчымасцяў для інвалідаў і іх удзелу ў жыцці грамадства нароўні з іншымі.
Удасканальваецца заканадаўчая база, у прыватнасці, у мэтах рэалізацыі Канвенцыі аб правах інвалідаў падрыхтаваны да другога чытання Закон Рэспублікі Беларусь «Аб правах інвалідаў і іх сацыяльнай інтэграцыі». Ён накіраваны на павышэнне якасці жыцця людзей з абмежаванымі магчымасцямі. Прадугледжана стварэнне рэабілітацыйных цэнтраў, увядзенне такога паняцця, як персанальны асістэнт інваліда, які не толькі ажыццяўляе догляд, але і пры неабходнасці аказвае юрыдычную дапамогу. Уводзіцца абавязак удзелу спецыялістаў па сацыяльнай працы ў пасяджэннях МРЭК для таго, каб кожнаму інваліду, ведаючы ўсе абставіны яго пражывання, можна было складаць рэальную праграму рэабілітацыі.
Надаецца ўвага і інклюзіўнай адукацыі, кватаванню працоўных месцаў, забеспячэнню даступнасці для інвалідаў аб'ектаў сацыяльнай, транспартнай, вытворчай інфраструктуры.
Дзейнасць усіх структур у гэтым кірунку каардынуе рэспубліканскі міжведамасны савет па правах інвалідаў, яго аддзяленне ёсць і ў Полацкім рэгіёне.
У Дзень інвалідаў Рэспублікі Беларусь хачу пажадаць кожнаму, перш за ўсё, здароўя, аптымізму, упэўненасці ў заўтрашнім дні. Вы з'яўляецеся для ўсіх нас прыкладам сілы духу, мужнасці і стойкасці. Мы ведаем аб вашых праблемах і імкнемся зрабіць усё магчымае для таго, каб іх вырашыць.
