Галоўнае пытанне парадку дня - праца, якая праводзіцца органамі мясцовага кіравання, прадпрыемствамі і арганізацыямі Полацкага раёна па захаванні гісторыка-культурнай спадчыны. З асноўным дакладам выступіла начальнік аддзела культуры Полацкага райвыканкама Алена Астапава.
— Асаблівая ўвага надаецца правядзенню работ па захаванні і рэстаўрацыі аб'ектаў гісторыка-культурнай спадчыны на тэрыторыі Полацка і Полацкага раёна, актыўны ўдзел у якой прымаюць спецыялісты Нацыянальнага Полацкага гісторыка-культурнага музея-запаведніка, Полацкага дзяржаўнага ўніверсітэта і Інстытута гісторыі Нацыянальнай акадэміі навук Беларусі , — паінфармавала Алена Аляксандраўна.
Дакладчык адзначыла, што ў Полацкім раёне вядзецца мэтанакіраваная работа па перадачы не выкарыстоўваемых помнікаў інвестарам для развіцця турыстычнага патэнцыялу рэгіёну.
Існуе шэраг пытанняў у сферы аховы гісторыка-культурнай спадчыны. Відавочныя праблемы ўзнікаюць з вывучэннем археалагічных аб'ектаў, у тым ліку правядзенне інвентарызацыі помнікаў археалогіі. Вострай застаецца і праблема фінансавання рамонтна-аднаўленчых і рэстаўрацыйных работ.
— Нягледзячы на праводзімую тлумачальную кампанію ёсць рост колькасці парушэнняў пры правядзенні земляных работ, як юрыдычнымі, так і фізічнымі асобамі, — падкрэсліла Алена Астапава.
Любая неабгрунтаваная змена знешняга выгляду культурнай каштоўнасці або парушэнне цэласнасці культурнага пласта цягне адміністрацыйную ці крымінальную адказнасць.
Па-ранейшаму застаюцца на кантролі пытанні па падтрыманні належнага тэхнічнага стану аб'ектаў гісторыка-культурных каштоўнасцей, іх эфектыўнага выкарыстання, у тым ліку ў частцы ўцягвання ў гаспадарчы абарот будынкаў і збудаванняў, якія не выкарыстоўваюцца.
— У цэлым у Полацкім раёне склалася пэўная сістэма ўзаемадзеяння органаў дзяржкіравання, прадпрыемстваў і арганізацый. Вялікую арганізацыйна-метадычную дапамогу аказваюць НПГКМЗ, ПДУ, у тым ліку ў частцы правядзення маніторынгаў і кансультавання, — падсумавала свой выступ Алена Аляксандраўна.
Аб актуальным стане і праблемах з аховай культурнага пласта Полацка расказаў кандыдат гістарычных навук, дацэнт кафедры сацыяльных камунікацый ПДУ Ігар Магалінскі:
— Вытворчасць любых земляных, будаўнічых, меліярацыйных і іншых работ на тэрыторыі археалагічных аб'ектаў дазваляецца толькі па ўзгадненні з Міністэрствам культуры і Інстытутам гісторыі НАН. Найбольш распаўсюджаным відам кантролю за правядзеннем гэтых мерапрыемстваў з'яўляецца археалагічны нагляд, які ўяўляе сабой спецыялізаванае даследаванне.
Ігар Уладзіміравіч адзначыў, што арганізацыі і прадпрыемствы горада, а таксама фізічныя асобы дасведчаныя аб неабходнасці папярэдняга ўзгаднення пры правядзенні земляных работ на сваіх аб'ектах. Дзякуючы цеснаму супрацоўніцтву знойдзена мноства артэфактаў. Аднак сустракаюцца і факты нядобрасумленнага выканання работ заказчыкамі і фізічнымі асобамі, некалькі выпадкаў несанкцыянаваных раскопак дзякуючы зладжанай рабоце зацікаўленых служб і неабыякавых грамадзян былі своечасова заўважаны і прыпынены.
Гістарычны цэнтр г.Полацка з'яўляецца гісторыка-культурнай каштоўнасцю і ахоўваецца дзяржавай. У сувязі з гэтым любыя земляныя работы на названай тэрыторыі праводзяцца толькі пасля ўзгаднення з адпаведнымі органамі, а таксама пры заключэнні дагавора на правядзенне археалагічных даследаванняў.
— Галоўнае — метадычна працаваць, падтрымліваць у належным стане помнікі і гісторыка-культурныя каштоўнасці, каб яны ўдзельнічалі ў выхаванні юных палачан, — падкрэсліла ў сваім выступленні дырэктар Нацыянальнага Полацкага гісторыка-культурнага музея-запаведніка Тамара Джумантаева.
Таксама на сесіі Полацкага раённага Савета дэпутатаў быў разгледжаны шэраг іншых пытанняў.
Святлана Валюшкіна, намеснік старшыні Полацкага райвыканкама:
— Значнасць і важнасць полацкага рэгіёна ў разрэзе гісторыі нашай дзяржавы складана пераацаніць. У нас больш за 100 аб'ектаў гісторыка-культурнай спадчыны, і сярод іх гістарычны цэнтр горада. Праца праводзіцца вялізная. Выдатна, што ў нас ёсць адукаваныя спецыялісты, якія займаюцца вывучэннем, захаваннем і рэстаўрацыяй гісторыка-культурных каштоўнасцей.
