Дадзенае Палажэнне вызначае парадак правядзення рэспубліканскага конкурсу па скарачэнні выкідаў ад механічных транспартных сродкаў (далей, калі не ўстаноўлена іншае, — конкурс).
У конкурсе могуць прымаць удзел юрыдычныя асобы, іх адасобленыя падраздзяленні (філіялы), якія маюць асобны баланс і бягучы (разліковы) банкаўскі рахунак з прадастаўленым службовым асобам гэтага адасобленага падраздзялення (філіяла) правам распараджацца грашовымі сродкамі на рахунку, і індывідуальныя прадпрымальнікі, ва ўласнасці, гаспадарчым вядзенні, аператыўным кіраванні, арэндзе або па іншай законнай падставе якіх знаходзіцца 25 і больш адзінак механічных транспартных сродкаў (далей — суб'екты).
Конкурс праводзіцца штогод Міністэрствам прыродных рэсурсаў і аховы навакольнага асяроддзя (далей — Мінпрыроды) і абласнымі і Мінскім гарадскім камітэтамі прыродных рэсурсаў і аховы навакольнага асяроддзя (далей — камітэты прыродных рэсурсаў).
Конкурс праводзіцца па выніках дзейнасці суб'ектаў за каляндарны год, які папярэднічае году правядзення конкурсу.
Конкурс праводзіцца па наступных намінацыях:
- суб'екты, якія эксплуатуюць ад 25 да 100 адзінак механічных транспартных сродкаў;
- суб'екты, якія эксплуатуюць 100 і больш адзінак механічных транспартных сродкаў.
Для ўдзелу ў конкурсе суб'екты ў тэрмін з 1 лютага да 1 сакавіка года, наступнага за справаздачным, накіроўваюць у камітэт прыродных рэсурсаў па месцы іх знаходжання:
- справаздачу ўдзельніка рэспубліканскага конкурсу па скарачэнні выкідаў ад механічных транспартных сродкаў;
- копіі часопісаў уліку мабільных крыніц выкідаў (ПОД-4) па форме згодна з дадаткам 10 да экалагічных норм і правілаў ЭкаНiП 17.08.06-001-2022 "Ахова навакольнага асяроддзя і прыродакарыстанне. Атмасфернае паветра (уключаючы азонавы пласт). Патрабаванні экалагічнай бяспекі ў галіне аховы атмасфернага паветра і азонавага пласта", зацверджаным пастановай Міністэрства прыродных рэсурсаў і аховы навакольнага асяроддзя Рэспублікі Беларусь ад 29 снежня 2022 г. N 32-т, па стане на 1 студзеня за два гады, што папярэднічаюць году, у якім праводзіцца конкурс;
- копіі пратаколаў правядзення вымярэнняў у дачыненні да вытворчых назіранняў выкідаў забруджвальных рэчываў у атмасфернае паветра ад мабільных крыніц выкідаў: пры эксплуатацыі ад 25 да 50 адзінак механічных транспартных сродкаў - за пяцігадовы перыяд да года, у якім праводзіцца конкурс; пры эксплуатацыі ад 51 да 100 адзінак механічных транспартных сродкаў - за трохгадовы перыяд да года, у якім праводзіцца конкурс; пры эксплуатацыі больш за 100 адзінак механічных транспартных сродкаў - за каляндарны.
У выпадку непрадстаўлення дакументаў, указаных у абзацах другім — чацвёртым часткі першай гэтага пункта, суб'екты не дапускаюцца да ўдзелу ў конкурсе.
Конкурс праводзіцца ў два этапы.
Першы этап конкурсу праводзіцца камітэтамі прыродных рэсурсаў у перыяд з 1 сакавіка па 31 сакавіка года, наступнага за справаздачным, і ўключае:
- разгляд і ацэнку дакументаў, прадстаўленых удзельнікамі конкурсу;
- вызначэнне пераможцаў першага этапу конкурсу (першае, другое і трэцяе месцы) па намінацыях конкурсу ў адпаведнасці з колькасцю набраных балаў;
- арганізацыю ўзнагароджання пераможцаў першага этапу конкурсу дыпломамі камітэта прыродных рэсурсаў I, II, III ступені ў кожнай намінацыі конкурсу;
- публікацыю вынікаў першага этапу конкурсу ў глабальнай камп'ютарнай сетцы Інтэрнэт на афіцыйным сайце камітэта прыродных рэсурсаў; накіраванне ў Мінпрыроды вынікаў першага этапу конкурсу і дакументаў.
Другі этап конкурсу праводзіцца Мінпрыроды сярод пераможцаў першага этапу конкурсу ў перыяд з 1 красавіка па 25 красавіка года, наступнага за справаздачным, і ўключае:
- разгляд і ацэнку інфармацыі, прадстаўленай камітэтамі прыродных рэсурсаў;
- вызначэнне пераможцаў (першае, другое і трэцяе месцы) па намінацыях конкурсу ў адпаведнасці з колькасцю набраных балаў;
- арганізацыю ўзнагароджання пераможцаў рэспубліканскага этапу конкурсу дыпломамі Мінпрыроды I, II, III ступені з выплатай заахвочванняў у кожнай намінацыі конкурсу;
- публікацыю вынікаў рэспубліканскага этапу конкурсу ў глабальнай камп'ютарнай сетцы Інтэрнэт на афіцыйным сайце Мінпрыроды.
Наваполацкая гарадская і раённая
інспекцыя прыродных рэсурсаў і
аховы навакольнага асяроддзя
