За яго плячыма вялікае жыццё, насычанае падзеямі. У iм былі і радасці, і страты. Але яго аптымізму, жыццялюбству можна было толькі пазайздросціць.
Аляксандр Філіпавіч Растапчын нарадзіўся 10 снежня 1927 года ў сяле Назар'ева Разанскай вобласці. У кастрычніку 1944 года ў няпоўных 17 гадоў пайшоў добраахвотнікам у войска. Удзельнічаў у вайне з Японіяй. Скончыў ваенна-авіяцыйнае вучылішча, а затым Рыжскае вышэйшае інжынерна-авіяцыйнае ваеннае вучылішча. Пасля яго заканчэння накіраваны на службу ў Полацк у ракетныя войскі стратэгічнага прызначэння. Пасля службы працаваў выкладчыкам у Полацкім гандлёва-тэхналагічным тэхнікуме. Ён да апошняга перадаваў свой жыццёвы вопыт і патрыятызм маладому пакаленню. У сэрцах і памяці палачан ён застанецца, як чалавек-эпоха. Яго імя навечна ўпісана ў гісторыю вялікіх дзядоў і прадзедаў, якія абаранілі і адстаялі мір і краіну.
