Чэк не толькі пацвярджае аплату за набытыя паслугі таксі, але і гарантуе абарону правоў пацярпелага пры надыходзе страхавога выпадку (факт прычынення шкоды жыццю, здароўю пасажыра і (або) страты, нястачы або пашкоджання (псавання) яго багажу пры ажыццяўленні пасадкі, перавозкі, высадкі пасажыра або пагрузкі, перавозкі альбо выгрузкі багажу.
Пры пасадцы ў аўтамабіль-таксі перад разлікам наяўнымі грашовымі сродкамі пасажыру трэба пераканацца, што аўтамабіль-таксі абсталяваны праграмнай касай для таксі або касавым падсумоўваючым апаратам, сумешчаным з таксометрам (далей - касавае абсталяванне).
Пры адмове кіроўцы выдаць чэк пры атрыманні ад пасажыра аплаты наяўнымі сродкамі за паездку пасажыр можа пакінуць свой зварот аб парушэнні парадку прыёму наяўных грашовых сродкаў з дапамогай сістэмы "обращения.бел" альбо здзейсніўшы званок у тэлефонную даведачную сістэму падатковых органаў "Кантакт-цэнтр".
Даведачна. Доступ да "Кантакт-цэнтра" падатковых органаў арганізаваны па адзіным тэлефонным нумары 189 для ўсіх аператараў сувязі, альбо па нумары 8 (017) 229 79 79.
Пасажыр таксама мае права ва ўказаным парадку інфармаваць падатковыя органы аб правапарушэннях у наступных выпадках:
- адсутнасць інфармацыі аб перавозчыку, кіроўцы, аўтамабілі ў Рэестры;
- не ўключэнне, няспраўнасць касавага абсталявання;
- неадпаведнасць памераў аплаты кошту пазначанай у чэку паездкі;
- адсутнасць у чэку прадугледжаных рэквізітаў (назва аўтамабільнага перавозчыка, УНП, дзяржаўны нумар аўтамабіля, дата і час пачатку і заканчэння паслугі, агульны кошт паслуг, унікальны ідэнтыфікатар (24 літарна-лічбавыя сімвалы, QR-код), іншая інфармацыя).
Пры ажыццяўленні паездкі ў таксі з няспраўным або выключаным касавым абсталяваннем пасажыр у выпадку, калі адсутнічае магчымасць атрымання чэка мае права не аплачваць паездку!
У выпадку ўзнікнення канфліктнай сітуацыі і наяўнасці з боку кіроўцы пагрозы прычынення шкоды жыццю або здароўю пасажыру рэкамендуецца ажыццявіць бясплатны званок па кароткім нумары 102 і паведаміць аб супрацьпраўных паводзінах кіроўцы аўтамабіля-таксі.
Акрамя таго, пасажыр можа праверыць добрасумленнасць аўтамабільнага перавозчыка і ўдакладніць знаходжанне як вадзіцеля, так і аўтамабіля ў "Рэестры аўтамабільных перавозак пасажыраў у нерэгулярных зносінах" (далей Рэестр). https://reestr.mtkrbti.by.
Даведачна. У адпаведнасці з Указам Прэзідэнта Рэспублікі Беларусь ад 25.01.2024 № 32 "Аб аўтамабільных перавозках пасажыраў" уведзены дзяржаўны інфармацыйны рэсурс "Рэестр". У рэестр уключаюцца звесткі аб аўтамабільных перавозчыках, аб транспартных сродках, аб вадзіцелях транспартных сродкаў, аб дыспетчарах аўтамабільных перавозак пасажыраў у нерэгулярных зносінах, аб дыспетчарах таксі.
Інспекцыя МПЗ па Полацкім раёне
