Навацыі заканадаўства, а таксама змены, якія чакаюць беларусаў, каментуе начальнік упраўлення па працы, занятасці і сацыяльнай абароне Полацкага райвыканкама Святлана Касьянава:
— Указам прадугледжваецца некалькі мер сацыяльнай падтрымкі.
Зняцце абмежавання памеру пенсіі працуючым пенсіянерам
Зараз для пажылых беларусаў прымяняецца індывідуальны каэфіцыент заробку (ІКЗ). Пенсіянеры, якія працуюць, у якіх ён вышэйшы за 1,3, атрымліваюць пенсію не ў поўным аб'ёме. Згодна з новым законам гэта абмежаванне адмяняецца. З 1 студзеня 2025 г. пенсія будзе выплачвацца ў поўным памеры, што не толькі павышае пенсійныя выплаты, але і стварае стымул як мага даўжэй працягваць працоўную дзейнасць.
Павелічэнне тэрміну падачы заявы аб прызначэнні пенсіі
Уводзіцца права звароту з заявай як за месяц да ўзнікнення права на пенсію, так і на працягу аднаго месяца пасля ўзнікнення дадзенага права. Калі гэты тэрмін вытрыманы, пенсію прызначаць з дня ўзнікнення права на яе. Пры больш позняй даце звароту з заявай пенсія будзе прызначацца з дня звароту па яе.
Спрашчаецца працэдура збору дакументаў аб заробку для вылічэння пенсіі
Указам фіксуецца 30-гадовы перыяд для разліку індывідуальнага каэфіцыента заробку. Далейшае штогадовае павелічэнне гэтага перыяду спыняецца ў мэтах паступовага пераходу да пацверджання заробку толькі дадзенымі індывідуальнага (персаніфікаванага) уліку фонду сацабароны насельніцтва (вядзецца з 2003 года), без прадстаўлення грамадзянамі "папяровых" даведак аб заробку.
Даведка аб памеры заробку выдаецца працадаўцам (яго правапераемнікам або архівам). Аднак калі дакументы не захаваліся, пры назначэнні пенсіі заробак за такую работу ўлічваецца з нулявым значэннем (што зніжае памер пенсіі). Устанавіць заробак работнік можа толькі ў судовым парадку.
У мэтах абароны інтарэсаў грамадзян у такіх сітуацыях і для зніжэння нагрузкі на суды ўказам прадугледжваецца права работніка не ўлічваць ("прапусціць") пры разліку індывідуальнага каэфіцыента заробку перыяды працы, дзе дакументы не захаваліся, з іх заменай больш раннімі перыядамі, дзе дакументы маюцца.
Пры гэтым пры наяўнасці ў грамадзяніна фактычнага стажу працы, за які ёсць звесткі аб заробку, 30 і менш гадоў гэты парадак вызначэння заробку не прымяняецца.
Уведзены дадатковыя катэгорыі грамадзян, якія могуць атрымліваць пенсію на пошце (у тым ліку з дастаўкай дадому). Гэта інваліды ІІІ групы; асобы з абмежаванай здольнасцю да самастойнага перамяшчэння (функцыянальны клас III і вышэй); якія ажыццяўляюць догляд дзіцяці-інваліда ва ўзросце да 18 гадоў і атрымліваюць дапамогу па догляду гэтага дзіцяці-інваліда; зарэгістраваныя па месцы жыхарства ў адным жылым памяшканні з інвалідам І групы, які атрымлівае пенсію праз аб'ект паштовай сувязі; пенсіянеры, якія дасягаюць 70-гадовага ўзросту да 1 студзеня 2025 г. Іншыя катэгорыі пенсіянераў таксама змогуць пры жаданні перавесці выплату пенсіі з банка на пошту пры ўмове аплаты паслуг пошты па выплаце пенсіі за кошт уласных сродкаў (па ўстаноўленых тарыфах).
Дадатковая падтрымка сем'ям з дзецьмі-інвалідамі
У выпадку смерці аднаго з бацькоў дзецям-інвалідам устанаўліваецца дадатковае павышэнне да пенсіі (з улікам ступені страты здароўя — ад 80 да 110% бюджэту пражытачнага мінімуму ў сярэднім на душу насельніцтва (БПМ). Павышэнне па гэтай падставе прадугледжана і для інвалідаў з дзяцінства I і II групы старэйшыя за 18 гадоў, калі карміцель памёр да іх паўналецця (у памеры 110 і 95% БПМ адпаведна).
Указам прадастаўлена права на датэрміновую пенсію па ўзросце бацькам дзяцей-інвалідаў (інвалідаў з дзяцінства), якія самастойна выхавалі дзіця, без удзелу маці. Сёння такая пенсія бацьку можа быць прызначана толькі пасля таго, як маці дзіцяці сфармавала права на гэтую пенсію і адмовілася ад яе на карысць бацькі або не паспела скарыстацца сваім правам у сувязі са смерцю.
Датэрміновую пенсію ўзамен маці прызначаць бацьку пры дасягненні ім 58-гадовага ўзросту, пры ўмове пацверджання факту выхавання дзіцяці-інваліда не менш як 8 гадоў да яго паўналецця, стажу работы не менш як 25 гадоў, з якіх не менш як 5 гадоў работы з выплатай страхавых узносаў (страхавы стаж).
Для жанчын з чатырма дзецьмі
З 1 студзеня 2025 г. жанчынам, якія нарадзілі чацвярых дзяцей і выхавалі іх да 8-гадовага ўзросту, страхавы стаж для прызначэння пенсіі па ўзросце зніжаецца з 10 гадоў да 5 гадоў, як гэта прадугледжана для жанчын з пяццю і больш дзецьмі.
Для рэалізацыі права на іншыя гарантыі, прадугледжаныя ўказам, грамадзянам неабходна звяртацца з праваўстанаўліваючымі дакументамі ва ўпраўленне па працы, занятасці і сацыяльнай абароне Полацкага райвыканкама (г. Полацк, пр-т Францыска Скарыны, 10, кабінеты №№ 109-116) . Прыёмныя дні: аўторак, чацвер - з 8.00 да 13.00 і з 14.00 да 17.00. Дадатковую інфармацыю можна атрымаць па тэлефонах: 46-23-75, 46-32-43, 46-61-12, 74-27-43, 46-54-32, 46-05-38, 46-28-85, 46-33-53, 46-75-13.
