На здымку: Таццяна Цітова і настаўнік гісторыі Сяргей Качарагін
На кантролі
На аператыўным пасяджэнні Полацкага райвыканкама Ірына Драздова, начальнік упраўлення па адукацыі, далажыла кіраўніцтву раёна аб гатоўнасці ўстаноў агульнай сярэдняй і дашкольнай адукацыі Полаччыны. Галоўная тэза яе выступлення — усе ўстановы раёна 1 верасня змогуць прыняць дзяцей.
Асобна абмяркоўвалася пытанне па Фарынаўскай СШ, дзе ідзе капітальны рамонт. На базе ўстановы адбыўся штаб з удзелам кіраўніцтва раёна, разглядаюцца некалькі варыянтаў размяшчэння вучняў. Канчатковае рашэнне будзе прынята ў канцы жніўня з улікам аб'ёму выкананых у рамках рамонту работ.
Ты гатова, Палата?
Калі мы прыехалі ў Палатоўскую БШ, дырэктарка Вольга В'юннік нават разгубілася — яна зусім не чакала ўбачыць карэспандэнтаў. Гэта для яе 5-я прыёмка школы на пасадзе кіраўніка.
Камісія з прадстаўнікоў упраўлення па адукацыі, Полацкага ЗЦГіЭ, Полацкага РАУС, раённага вучэбна-метадычнага кабінета ў гэты дзень працавала пад кіраўніцтвам Таццяны Цітовай, намесніка начальніка ўпраўлення.
1 верасня Палатоўская БШ рыхтуецца прыняць 38 навучэнцаў 1-9 класаў, ва ўстанове таксама адкрыта дашкольная група для 4 выхаванцаў. Працоўны калектыў складаецца з 17 педагогаў і 15 чалавек тэхперсаналу. Нягледзячы на малакамплектнасць, патрабаванні да ўстановы такія ж, як і для вялікіх школ.
За кошт бюджэтных сродкаў правялі касметычны рамонт усіх памяшканняў, выкананы частковы рамонт даху, набыта новая мэбля для дашкалят. Асаблівую ўвагу надалі кабінету абслугоўваючай працы.
На харчаблоку камісію сустрэла повар Вольга Вашчанка (на фота злева), якая працуе ў Палатоўскай БШ каля 30 гадоў, з якіх у школьнай сталовай — каля 15. "Харчаблок наш цалкам абсталяваны -маюцца 2 агароднінарэзкі, 2 электрапліты, электраскаварады, электрамясарубка, халадзільнікі", — распавяла яна.
З удзячнасцю
— Мне шанцуе: кожны год знаходзяцца былыя вучні школы, якія нам дапамагаюць. Сёлета гэта Аляксандр Валошын, які скончыў школу больш за 20 гадоў таму, - падзялілася Вольга Аляксандраўна. - З нашых матэрыялаў ён вырабіў для школы дзверы, заслаў лінолеўм у калідорах.
У мікрараёне Громы
У Полацку завяршаецца работа па падрыхтоўцы да адкрыцця ў мікрараёне Громы новага дзіцячага дома сямейнага тыпу. Плошча двухпавярховага будынка - больш за 200 м2. Дом разлічаны на пражыванне сям'і з 10 дзецьмі.
Гавораць спецыялісты
Каментар па выніках праверкі гатоўнасці ўстаноў адукацыі Полацкага раёна да новага навучальнага года нам далі прадстаўнікі кантрольна-наглядных служб.
Іна САЛУЯНАВА, загадчык аддзялення гігіены дзяцей і падлеткаў Полацкага ЗЦГіЭ:
- На кантролі санэпідслужбы - падтрыманне здароўезберагальнага асяроддзя: спраўнасць сістэм асвятлення, водазабеспячэння і водаадвядзення, аснашчэнне вучнёўскай мэбляй у адпаведнасці з ростам навучэнцаў, аздабленне памяшканняў. Асаблiвая ўвага - падрыхтоўцы харчаблокаў, іх абсталяванню, у тым ліку механізаванню нарэзкі гародніны, мыццю посуду, усталёўцы параканвектаматаў для зберагаючага рэжыму прыгатавання страў. На сёння ўпраўленнем па адукацыі набыта 61 адзінка халадзільнага і тэхналагічнага абсталявання.
Усе ўстановы раёна выканалі дадзеныя раней прадпісанні. Добрая падрыхтоўка ў Заазерскай ПШ, Шпакоўшчынскай БШ, Вароніцкай СШ, СШ №№ 6, 8, 14, 18, ДС №№ 25, 3, 15, 33, Дашкольным цэнтры развіцця дзіцяці.
Святлана КРЫМСКАЯ, інжынер па ахове працы Цэнтра па забеспячэнні дзейнасці бюджэтных арганізацый сістэмы адукацыі Полацкага раёна:
— Сумесна з прадстаўніком Полацкага ГРАНС мы правяралі забеспячэнне пажарнай бяспекі ўстаноў: стан эвакуацыйных выхадаў і шляхоў эвакуацыі, спраўнасць сістэмы пажарнай сігналізацыі і абвесткі аб пажары; наяўнасць запасу пажарных апавяшчальнікаў; абсталяванне працаўнікоў, задзейнічаных у эвакуацыі пры пажары, самавыратавальнікамі; афармленне неабходных дакументаў.
Адзначаем добрую работу па забеспячэнні пажарнай бяспекі ў ДС №№ 32, 33, 29, 25, СШ №№ 18, 6, Маласітнянскай, Палатоўскай БШ, Багатырскім і Дрэтунскім ДС.
Кацярына РАЖАНЕЦ, старшы інспектар арганізацыі дарожнага руху аддзела ДАІ Полацкага РАУС:
— Мы кантралюем стан праезнай часткі пад'язных шляхоў, наяўнасць вулічнага асвятлення, выключэнне магчымасці заезду іншага транспарту на тэрыторыю ўстаноў, стан пешаходных сувязей (тратуар, пешаходная дарожка), неабходнасць прымянення тэхнічных сродкаў арганізацыі дарожнага руху для зніжэння інтэнсіўнасці руху транспарту, для выключэння паркоўкі паблізу нерэгулюемых пешаходных пераходаў. Праблемныя моманты абмяркоўваем сумесна з зацікаўленымі на пасяджэнні камісіі па забеспячэнні бяспекі дарожнага руху пры Полацкім райвыканкаме. Дзякуем упраўленню па адукацыі і педагагічным калектывам за сумесную работу, накіраваную на забеспячэнне бяспекі дарожнага руху.
Вольга БЯРОЗІНА, загадчык аддзела экалагічнага выхавання Полацкага РЦДіМ:
— Сёлета ўмовы надвор'я ўнеслі свае карэктывы ў работу па добраўпарадкаванні і азеляненні: узніклі дадатковыя клопаты па выдаленні паваленых дрэў або іх частак. Лепшымі па добраўпарадкаванні і азеляненні тэрыторый сярод гарадскіх школ сталі ПГГ №1, СШ №№16, 18, 8. Высокі ўзровень азелянення ў СШ №№ 1, 6, 14, Полацкім кадэцкім вучылішчы. Сярод сельскіх школ лідзіруюць Заазерская ПШ, Вароніцкая СШ, Шпакоўшчынская БШ. Сярод гарадскіх дашкольных устаноў - ДС №№ 7, 15, 31, 32. Відаць якасная работа па азеляненні ў ДС №№ 12, 14, 16, 20, 25, 27, 28, 29, 33. Тройка лідэраў у сельскай мясцовасці - Багатырскі, Дрэтунскі, Навагаранскі ДС.
Такім чынам, асноўны этап па падрыхтоўцы школ і дзіцячых садоў да 1 верасня завершаны. Да 12 жніўня плануецца падпісаць усе пашпарты гатоўнасці ўстаноў. А значыць, іспыт здалі!
Фота з архіва "ПВ".
