У Полацкім раёне летам будуць працаваць розныя віды дзіцячых лагераў. Колькасць месцаў у іх сёлета павялічана.
З 3 чэрвеня ва ўсіх школах раёна, гімназіях, РЦДіМ і ЦКРНіР адкрыліся дзённыя лагеры. У другую змену такі лагер будзе арганізаваны ў ПГГ №1, у трэцюю — у ПГГ №2, СШ №№1, 2, 6, 8, 10, 14, 16, 18, Фарынаўскай СШ. Працягласць змены складзе 18 дзён. У школьных лагерах у летні перыяд плануецца аздаравіць 2000 дзяцей (+55 да паказчыка 2023 года).
У чатыры змены (у 2023-м — у тры) будуць прымаць дзяцей загарадныя лагеры з кругласутачным знаходжаннем: "Чайка " упраўлення па адукацыі, "Космас" ААТ "Полацк-Шкловалакно", у тры змены — "Лясная казка" аддзела спорту і турызму. Па традыцыі будзе арганізавана работа профільных лагераў - "Азімут" (на базе Полацкага РЦДіМ) і "Патрыёт" (на базе в/ч 32404). У 2023 годзе лагер "Патрыёт" прымала в/ч 5530. Усяго ў лагерах з кругласутачным знаходжаннем плануецца аздараўленне 1690 дзяцей (+120 да паказчыка 2023 года). Спартыўныя лагеры дапамогуць не страціць летам добрую фізічную форму выхаванцам полацкіх спартыўных школ і Віцебскага абласнога ЦАР.
120 дзяцей старэйшых за 14 гадоў будуць працаваць у лагерах працы і адпачынку (у 2023-м — у 9) у школах №№ 1, 2, 6, 10, 15, 16, Багатырскай, Ветрынскай, Гаранскай, Фарынаўскай.
Для арганізацыі летняй занятасці рабят створаць рознаўзроставыя атрады па месцы жыхарства ў мікрараёнах Ноўка, Марыненка, Цэнтр нашага горада, а таксама ў аг. Жарнасекі. Дарэчы, толькі на базе аддзела экалагічнага выхавання Полацкага РЦДіМ (Гагарына, 138) будуць адкрыты 6 рознаўзроставых атрадаў рознага профілю: "Робат-ОМ", Smile Designers, "Зялёная планета", "ЭкаЖыццё", "Сонечныя зайчыкі" .
Як дзіця будзе адпачываць летам, у кожнай сям'і вырашаюць самастойна. Важна, каб канiкулы пакінулі ў яго прыемныя ўражанні. А зрабіць летні адпачынак карысным павінны дарослыя, і аздараўленчы лагер для гэтага цудоўна падыходзіць.
З пытаннямі аб накiраванні дзяцей у аздараўленчыя лагеры мы звярнуліся да галоўнага спецыяліста ўпраўлення па адукацыі Полацкага райвыканкама Анжэлы ВАЛАСЕВІЧ:
— Які кошт пуцёўкі ў лагер?
— Бацькоўская даплата ў аздараўленчых лагерах з дзённым знаходжаннем дзяцей на базе гарадскіх школ — ад 15 да 44 руб. у залежнасці ад узросту дзіцяці. У сельскіх школах, а таксама школах №11 і №15 харчаванне дзяцей арганізуецца бясплатна. Кошт пуцёўкі ў аздараўленчы лагер "Чайка" складае ад 544 да 552 руб., з якіх 248 руб. — дзяржаўная датацыя.
— Для якіх катэгорый дзяцей прадугледжаны льготы пры набыцці пуцёвак?
— З даплатай да поўнага кошту за кошт сродкаў раённага бюджэту, але не больш за адзін раз на працягу года, прадастаўляюцца пуцёўкі ў аздараўленчыя лагеры, размешчаныя на тэрыторыі Полацкага раёна:
- дзецям са шматдзетных сем'яў, работнікаў бюджэтных устаноў, якія фінансуюцца з раённага бюджэту;
- дзецям, у якіх абодва бацькі — непрацуючыя пенсіянеры;
- дзецям-інвалідам, дзецям з асаблівасцямі псіхафізічнага развіцця;
- дзецям-інвалідам-калясачнікам і суправаджаючым іх;
- дзецям-сіротам, дзецям, пакінутым без апекі бацькоў, дзецям з малазабяспечаных сем'яў, са шматдзетных сем'яў работнікаў небюджэтных устаноў, дзецям, прызнаным знаходзячымiся ў сацыяльна небяспечным становішчы.
— Які перыяд аздараўленчых змен у загарадным лагеры "Чайка" упраўлення па адукацыі ў 2024 годзе?
- 1 змена - з 10 па 24 чэрвеня, 2 змена - з 27 чэрвеня па 11 ліпеня, 3 змена - з 14 па 28 ліпеня, 4 змена - з 31 ліпеня па 14 жніўня.
- Куды звяртацца бацькам для набыцця пуцёўкі?
— У школьныя лагеры — непасрэдна ў школы; у лагер "Чайка" — па тэлефоне 43-60-79, Людміла Іванаўна Мінчанка; у лагер "Патрыёт" — па тэлефоне 49-35-49.
Да ўвагі!
У апошнія гады на інтэрнэт-рэсурсах размяшчаецца інфармацыя аб арганізацыі аздараўлення дзяцей ІП і арганізацыямі недзяржаўнай формы ўласнасці (ПУП, ТАА, фермерскімі гаспадаркамі, рэлігійнымі арганізацыямі, суб'ектамі аграэкатурызму). Органамі пракуратуры рэспублікі ў такіх "лагерах" былі выяўлены шматлікія парушэнні, якія пацягнулі ў тым ліку траўміраванне дзяцей.
Звяртаем увагу, што права і парадак ажыццяўлення дзейнасці па аздараўленні дзяцей у рамках аздараўленчага лагера іншымі арганізацыямі (акрамя ўстаноў адукацыі) заканадаўствам не прадугледжаны. Гатоўнасць да работы аздараўленчых арганізацый для дзяцей вызначаецца ў нашым раёне спецыяльнай камісіяй, створанай пры Полацкім райвыканкаме. Дакументы аб гатоўнасці павінны афармляцца не пазней як за 3 дні да даты адкрыцця на ўвесь перыяд аздараўленчага сезона.
