У камандзе
Газета - дзіўны прадукт. Ён спалучае ў сабе творчасць і эканоміку, натхненне і вытворчасць, таленты, веды і навыкі дзясяткаў людзей розных прафесій. У кожнага свая задача, але вынік іх працы павінен гарманічна і дакладна ўпісацца ў агульную канцэпцыю і тэхналогію.
Гарачы час
Ёсць яшчэ і часовыя рамкі. Таму панядзелак і чацвер - дні напярэдадні выхаду газеты - у рэдакцыі асаблівыя: здаемся ў друк. Праца кіпіць, напруга часам зашкальвае. Працягвае паступаць аператыўная інфармацыя, і яе трэба паспець апрацаваць і размясціць у нумар, завяршаецца вёрстка газетных старонак - палос (а то і іх перавёрстка з улікам атрыманых навін, якія трэба тэрмінова апублікаваць). Аўтары і тэхнічныя спецыялісты, карэктар, дзяжурны па нумары, кіраўнік - усё ў справе. Уносім апошнія змены, чытаем, "пакуем" нашы электронныя файлы і перадаем іх па электроннай пошце ў друкарню.
Файлы, формы і афсет
Эстафету прымаюць калегі-паліграфісты КВУП "Наваполацкая друкарня", дзе на працягу дзясяткаў гадоў друкуецца наша газета. Там свая спецыфіка.
Вёрсткай газетных палос, гэта значыць іх раскладкай у вызначанай паслядоўнасці, займаюцца аператары электроннага набору і вёрсткі. Наступны этап - выраб друкаваных формаў. Адбываецца гэта на ўчастку, які так і называецца "формны". Тут выкарыстоўваецца тэхналогія CtP (Computer-to-Plate). Яна ўяўляе сабой кіруемы кампутарам працэс запісу выявы на формны матэрыял — алюмініевую пласціну з фотаадчувальным пакрыццём.
Атрыманыя формы адносяць у друкаваны цэх, дзе метадам афсетнага друку малюнак з іх пераносіцца на паперу.
Паштовы маршрут
Стопкі надрукаваных газет пакуюць і ва ўрочную гадзіну грузяць у паштовую машыну, якая едзе ў Полацкі РВПС, дзе іх сартуюць і адпраўляюць па аб'ектах пошты. У аддзяленнях паштовай сувязі "ПВ" трапляе ў рукі паштальёнаў, і яны, размеркаваўшы газеты па адрасах, дастаўляюць іх падпісчыкам.
На сустрэчу з чытачом
…Вось такі немалы шлях праходзіць "Полацкі веснік". Некалькі дзён над нумарам “чаруюць” у рэдакцыі, пару гадзін – у друкарні, яшчэ адну ноч ён “даспявае” на пошце. Вядома, на гэтым шляху таксама бывае ўсякае: незаўважанымі застаюцца памылкі друку; сустракаюцца капрызныя суразмоўцы; не спрацоўваюць фотакамеры і разраджаюцца батарэі дыктафонаў; "глючаць" кампутары і друкаванае абсталяванне…
Але ў кожны газетны нумар наш калектыў укладвае часцінку сваёй душы, імкнучыся здабыць для вас, нашы дарагія сябры, сааўтары і крытыкі, толькі правераныя навіны, самыя ўдалыя кадры і найбольш цікавыя гісторыі. Мы любім газетную справу і таму — хвалюючыся і перажываючы — зноў і зноў ідзем да друку!
— Самае складанае ў гэтым працэсе — зрабіць усё максімальна добра і своечасова, — зазначае намеснік галоўнага рэдактара Святлана Альсевіч. - Патрэбны аператыўнасць, уменне сканцэнтравацца, камандная праца і ўзаемавыручка, паразуменне, вострае вока, хуткія рукі і ногі. Гэта значыць, высокі прафесіяналізм, які ляжыць у аснове поспеху і якім валодае наш калектыў. Гэта дазваляе «Полацкаму весніку» заставацца адным з вядучых СМІ ў вобласці.
— Мы друкуем газеты для ўсяго заходняга рэгіёну вобласці. Гэта прадукцыя сацыяльнай значнасці, — кажа дырэктар КВУП "Наваполацкая друкарня" Уладзімір Каліна. — У газетнай вытворчасці ёсць свае асаблівасці. І ў першую чаргу вялікая адказнасць, бо гэта жорсткі графік і якасць.
