Напярэдадні яркага вясновага свята 8 Сакавіка ў Мінску прайшоў маштабны жаночы форум. Каля 600 прадстаўніц прыгожага полу з усіх рэгіёнаў краіны прыехалі на сустрэчу з Кіраўніком дзяржавы. Зносіны Аляксандра Лукашэнка з актывам Беларускага саюза жанчын доўжыліся амаль дзве з паловай гадзіны і былі вельмі душэўнымі і давернымі.
Зразумела, беларускага лідэра не адпусцілі без падарунка. Прадстаўніцы аб'яднання паднеслі ў дар Аляксандру Лукашэнка пано «Мой старажытны Полацк». Аўтар — палачанка Святлана Балтрушэвіч, член Беларускага Саюза майстроў народнай творчасці. Пано выканана ў тэхніцы лапікавага шыцця, аднаго з найстаражытных традыцыйных рамёстваў. Майстры полацкай зямлі аднымі з першых пачалі актыўна развіваць гэты від народнай творчасці. Унікальнасць тэхнікі ў тым, што работа выконваецца з кавалачкаў тканіны, якія замацоўваюцца аздобнымі радкамі. У выніку атрымліваецца цэласная мастацкая выява.
На пано прадстаўлены куток старажытнага Полацка зімой. Выява самабытнай архітэктуры спалучаецца з велічнымі вежамі Сафійскага сабора, што надае выяве асаблівы культуралагічны сэнс. Старажытны Полацк — цэнтр беларускай дзяржаўнасці. Менавіта тут тысячу гадоў таму прападобная Еўфрасіння Полацкая паклала пачатак жаночаму руху на беларускіх землях, выбраўшы шлях самаадданага служэння Радзіме і людзям, стаўшы прыкладам для ўсіх беларускіх жанчын.
