Кожны дзень прыносіць апошнія навіны з хлебных палёў. Актыўнымі тэмпамі ідзе ўборка ўраджаю ва УП «Гараны-Агра». На 3 жніўня тут па-ранейшаму самая высокая ўраджайнасць у раёне - 42 ц/га.
- Строгае выкананне тэхналогій дазволіла захаваць ураджай, нягледзячы на засуху ў першай палове лета і нядаўні моцны град, - кажа дырэктар прадпрыемства Яўген Блохаў. - Вядома, выпрабаванне стыхіяй мае непрыемныя наступствы, але аграрыі настроены на добры вынік.
З ходам жніва ў сельгаспрадпрыемстве на бягучым тыдні азнаёміўся старшыня Полацкага райвыканкама Ігар Марковіч, які падкрэсліў, што кожны працаўнік на сваім працоўным месцы павінен разумець меру сваёй адказнасці ў няпросты перыяд, бо ад гэтага залежыць харчовая бяспека як раёна, так і ўсёй краіны.
Ва ўрочышчы Бродак, дзе ішла ўборка пацярпелага ад граду азімага рапсу, сустрэліся з камбайнерам Пятром Карклінем і яго памочнікам Ігарам Данілкіным, які ў папярэднія гады разам з Сяргеем Гарбаценкам не раз станавіўся тысячнікам на жніве. Сучасны камбайн «New Holland» у чарговы сезон таксама ў надзейных руках. Камбайнеры маюць намер сабраць ураджай да апошняга зярнятка. Старшыня райвыканкама Ігар Марковіч пацікавіўся ўмовамі працы, звярнуў увагу на выкананне тэхналогій, тэхнікі бяспекі. Разам абмеркавалі ход асноўных работ у гаспадарцы.
Нягледзячы на тое, што пераменлівае надвор'е паказытала нервы, галоўны аграном гаспадаркі Алена Івашкевіч пазначыла добрыя перспектывы:
— Робім усё магчымае, каб якасна і своечасова ўбраць ураджай. З-за адсутнасці ў пачатку лета дажджоў пакуль адстаём у параўнанні з мінулым годам па кармах, паралельна рыхтуемся да сяўбы азімых культур. Сёлета з-за ўмоў надвор'я супалі адразу тры сельскагаспадарчыя кампаніі. Калектыў працуе напружана, усё разумеюць пастаўленыя задачы.
Малады дэсант
Свой уклад у агульны вынік уносіць і моладзь. Гэтымі днямі для іх на зернетаку УП «Гараны-Агра» таксама гарачая пара. Працуюць 12 чалавек - навучэнцы старэйшых класаў мясцовай школы і хлопцы, якія ўжо навучаюцца ў навучальных установах. Праца арганізавана ў дзве змены. На першы погляд яна простая, але хто знаёмы са збожжатокам, ведае, што патрэбная.
— Праяўляючы цікавасць да сельскагаспадарчай сферы, хлопцы выконваюць усе даручаныя заданні, — расказаў кіраўнік сельгаспрадпрыемства Яўген Блохаў. - Яны не адмаўляюцца ні ад якой працы. Калі раптам нешта незразумела, тлумачым, адказваем на пытанні. Гэта таксама ў нашых інтарэсах — гадаваць моладзь, якая, магчыма, праз некалькі гадоў вернецца да нас ужо маладымі спецыялістамі.
Юным памочнікам акрамя варашэння збожжа, прывезенага ад камбайнаў, неабходна яшчэ і сачыць за парадкам у памяшканнях зернесушыльнага комплексу, а таксама за тым, каб літаральна кожнае зярнятка новага ўраджаю не прапала. З дапамогай выдадзенага няхітрага інвентара - рыдлёвак і мёцел - яны добра выконваюць свае абавязкі працоўных збожжатока. Акрамя гэтага 2 маладыя чалавекі дапамагаюць жывёлаводам на ферме, 1 — на выпасе кароў.
Фота Святланы Альсевіч.
