У былыя гады ў летні перыяд назіралася зніжэнне пакупніцкага попыту на нашу прадукцыю, цяпер сітуацыя змянілася, на складах нічога не захоўваецца, - адзначыў у пачатку нашай размовы дырэктар прадпрыемства Сяргей Васільеў.
За апошні час Полацкая птушкафабрыка зведала некалькі рэарганізацый. З 2000 года прадпрыемства працавала як вытворчы ўчастак ААТ «Глыбоцкі камбікормавы завод», у лістападзе 2018 года УВП «Полацкая птушкафабрыка» ўвайшла ў давернае ўпраўленне ААТ «Полацкі камбінат хлебапрадуктаў», затым - у Полацкую інтэграцыйную структуру ААТ «Полацкі малочны камбінат». З ліпеня 2022 года камбікармы для птушкапагалоўя вырабляюцца на ААТ «Глыбоцкі камбікормавы завод» на давальніцкай сыравіне.
У цяперашні час на прадпрыемстве ўтрымліваецца 140 тысяч курэй, з новай пасадкай будзе 180 тысяч. У пытаннях вырошчвання маладняку курэй-нясушак шмат тонкасцей, птушка патрабуе своечасовай вакцынацыі, збалансаванага кармлення. Застаецца складанай сітуацыя з птушыным грыпам. Але запатрабаванасць прадукцыі падганяе вытворцаў прафесійна вырашаць усе пытанні.
— У новых умовах мы перабудавалі працу па забяспечанасці збожжавай сыравінай і складнікамі для падрыхтоўкі камбікармоў для кармлення птушкі. Купляем сутачны маладняк курэй-нясушак, вырошчваем 4-5 месяцаў, строга выконваючы тэхналогію, - растлумачыў сітуацыю Сяргей Васільеў. - Птушка змяшчаецца ў нас да 500 дзён, а затым ідзе на забой і перапрацоўку. Яе месца займае маладняк.
Раней на прадпрыемстве займаліся вырошчваннем куранят бройлераў, зараз зроблены ўпор толькі на вытворчасць яйка курынага. Дырэктар з задавальненнем адзначыў, што паступова выраўноўваецца сітуацыя з наяўнасцю зерневай сыравіны. Пытанне правільнага кармлення курэй - адно з самых важных. Рацыянальнае і якаснае харчаванне птушкі спрыяе ўмацаванню яе імунітэту, паляпшэнню прадуктыўнасці і ўстойлівасці да розных хвароб. Атрымліваючы спецыяльны корм, нясушкі павялічваюць колькасную прадуктыўнасць, а ў яек паляпшаюцца арганалептычныя ўласцівасці. Камбінаваны корм для курэй-нясушак па рэцэптуры абавязкова змяшчае арганічныя кампаненты - збожжа, шрот сланечніка, раслінныя алеi, дадатковымі элементамі становяцца солі, дрожджы, вітаміны, ферменты. Заатэхнік, ветурач птушкафабрыкі сумесна з супрацоўнікамі лабараторыі ААТ «Глыбоцкі камбікормавы завод» на кожны ўзрост распрацоўваюць свой рэцэпт.
Кіраўніцтву і калектыву фабрыкі, у якім працуе 70 чалавек, надало аптымізму і ўпэўненасці ў заўтрашнім дні рашэнне аб замене кроса птушкі на больш яйцаноскі і прадуктыўны. Ужо ўдалося дасягнуць сярэднерэспубліканскіх паказчыкаў па яйцаноскасці і захаванасці птушкі. Час паказаў, што меры для развіцця вытворчасці прыняты правільныя і планы на аднаўленне птушкапагалоўя і аб'ёмаў прадукцыі - цалкам рэальныя. Задача прадпрыемства - павялічыць вытворчасць яйка курынага да 3 млн штук у месяц.
Прадукцыя Полацкай птушкафабрыкі запатрабаваная на ўнутраным рынку. Для выканання выручкі рэалізацыя яйка курынага вядзецца ў 7 раёнах Віцебскай вобласці. «Наша прадукцыя ідзе на ўра ў Мiнску, - адзначыў дырэктар. - Мы рэгулярна ездзім туды на кірмашы. Ахвотна купляюць полацкія курыныя яйкі жыхары Наваполацка і Віцебска, разумеючы, што мясцовая прадукцыя - заўсёды свежая». Птушкафабрыка рэалізуе сваю прадукцыю ў 16 гандлёвых пунктах Полацка, Наваполацка і Віцебска. З улікам складанай эпідабстаноўкі часова спынена рэалізацыя яйка курынага ў сельскай мясцовасці.
У дасягненні вытворчых паказчыкаў дырэктар адводзіць вялікую ролю аператарам птушкагадоўчых ферм. Працавітыя жанчыны ўкладаюць у працу не толькі фізічныя сілы і глыбокія веды, але і душу. «Добры птушкагадоўца можа вырасці толькі праз 2-3 гады», – перакананы Сяргей Васільеў. Прафесіяналамі ён назваў Святлану Феафілактаву, Святлану Ільіну, Алену Камісарову, Алену Істоміну, Таццяну Ігнацьеву, Алену Павукову і Ніну Чыжэўскую. Гэтым работніцам па плячы гаспадарчыя разліковыя заданні па захаванасці птушкі, яе прадуктыўнасці. Што тычыцца нагрузкі на работнікаў — яна дастаткова высокая: тры птушніцы і слесар абслугоўваюць пагалоўе з 60 тысяч птушак. Сярэдняя заработная плата на фабрыцы - 890 рублёў, з ростам вытворчасці і яна будзе павялічвацца.
На прадпрыемстве пастаянна паляпшаюцца ўмовы працы. Маецца свая сталовая, кошты на абеды ў якой датуюцца. На тэрыторыі працуе свой міні-магазін, дзе ёсць магчымасць у лік заработнай платы набыць прадукцыю птушкафабрыкі і іншыя прадукты харчавання. Работнікам рэгулярна выдаецца спецвопратка. З улікам спецыфікі вытворчасці і неабходнасці захавання санітарных норм абсталяваны душавыя кабіны, ёсць індывідуальныя шафы для адзення.
Напрыканцы размовы пра будні Полацкай птушкафабрыкі яе дырэктар падзякаваў пастаянным партнёрам і пакупнікам за выбар заўсёды свежай і якаснай прадукцыі мясцовага вытворцы.
