"На думку аматараў хакея, балельшчыкаў, якія сочаць за гульнёй "Лакаматыва" ў Экстралізе, гэты сезон стаў лепшым у гісторыі каманды. Юнакі паказвалі добры хакей, не аднойчы абыгрывалі фаварытаў рэгулярнага чэмпіянату. З першых матчаў сезона набралі добры тэмп. Пабывалі на першым месцы турнірнай табліцы, трымаліся за трэцяе, чацвёртае месцы. І гэта з улікам таго, што ў бягучым сезоне каманда абнавілася на 50 працэнтаў, - адзначыў дырэктар ХК. - З новага сезона пачнём прыцягваць у асноўную каманду выхаванцаў уласнай школы. Але гэта ўсяго некалькі юнакоў, таму цяпер стараемся зрабіць усё магчымае для таго, каб захаваць ігракоў бягучага складу. Будзем прадаўжаць актыўна працаваць у тых умовах і з тымі рэсурсамі, што ёсць у клуба".
Клуб 21 красавіка адзначыць сваё пяцігоддзе. Свята пачнецца на Лядовай арэне ў Оршы ў 17.00. Для сваіх балельшчыкаў "Лакаматыў" падрыхтаваў насычаную праграму. Тут правядуць аўтограф-сесію ігракоў, розыгрыш веласіпеда, будзе працаваць новая фотазона. Акрамя гэтага, хакеісты разам з балельшчыкамі сфарміруюць зборныя, роўныя па сіле каманды, і згуляюць адзін з адным.
"Лакаматыў-Орша" стартаваў у чэмпіянаце Беларусі ў сезоне 2018/2019, па выніках якога атрымаў перамогу ў дывізіёне Б. Каманда паўтарыла поспех у наступным сезоне і выйшла ў плэй-оф, дзе сустрэлася з мінскім "Юнацтвам". У серыі з шасці матчаў "Лакаматыву" ўдалося двойчы абыграць знакамітага саперніка. За апошнія тры сезоны падапечныя Ігара Жылінскага выдатна прыбавілі. Цяперашні чэмпіянат, у якім ужо няма падзелу на дывізіёны, каманда завяршыла на 7-м месцы. Для таго каб апынуцца ў запаветнай шасцёрцы і стаць уладальнікам прамой пуцёўкі ў плэй-оф, ёй не хапіла двух ачкоў.
У структуру хакейнага клуба "Лакаматыў-Орша" ўваходзіць прафесійная каманда па хакеі, а таксама дзіцяча-юнацкая спартыўная школа, дзе рыхтуюць юнакоў па трох напрамках: хакей з шайбай, шорт-трэк і цяжкая атлетыка. Сёння ў ДЮСШ займаюцца больш за 300 чалавек.
