На гала-канцэрце фіналісты прапанавалі свае конкурсныя нумары на суд гледачоў і журы. Гэта былі лепшыя артысты з больш як тысячы прэтэндэнтаў вочнага тура. Таксама на Гран-пры прэтэндавалі фіналісты анлайн-конкурсу, сярод якіх былі выканаўцы з Беларусі, Расіі, Ізраіля, Егіпта.
Зала бурнымі апладысментамі сустракала ўдзельнікаў заключнага творчага спаборніцтва. Лаўрэаты першай ступені спаборнічалі за два Гран-пры - у вакальнай і харэаграфічнай намінацыях. Незабыўным голасам захапіў гледачоў і кампетэнтных суддзяў артыст з Кітая, выканаўшы песню пра каханне. Аднак спявачкі з Беларусі і Арменіі ўзняліся на самую высокую прыступку топа, захапіўшы ў палон сэрцы ўсіх, хто знаходзіўся ў зале, таму галоўная інтрыга да канца трымала гледачоў у напружанні.
Што датычыцца танцавальных нумароў, то выключнай любоўю гледачоў карысталіся "Віцебскія дзяўчаты" - калектыў, які выканаў яўрэйскі танец, нагадаўшы гасцям фестывалю, што ў абласным цэнтры некалі жыў і працаваў Марк Шагал.
Не раз меркаванне слухачоў і балельшчыкаў разыходзілася з ацэнкамі членаў журы. Гэта было нядзіўна, паколькі на гала-канцэрце былі прадстаўлены адборныя, самыя сакавітыя выступленні. Як суддзям удалося выбраць сярод лепшых самых лепшых, застаецца загадкай, але на тое яны і прафесіяналы, каб улоўліваць кожны недахоп у песні і танцы.
Галоўны прыз "Арт-парада ў Віцебску" і сертыфікат на ўдзел у XXXII фестывалі мастацтваў "Славянскі базар у Віцебску" ў намінацыі "Вакал" уручылі Марыцы Цілікян з Арменіі, якая ўразіла ўсіх пранікнёнай баладай на ваенную тэму.
У харэаграфіі перамогу прысудзілі віцябчанам - народнаму тэатру-студыі сучаснай харэаграфіі пад кіраўніцтвам Дзіяны Юрчанка. Артысты гэтага калектыву ўжо былі заяўлены як удзельнікі будучага форуму мастацтваў, таму сваю пуцёўку на фестываль яны падарылі ўзорнаму ансамблю танца "Натхненне" (Беларусь).
