Збор прадметаў прыгожага рукадзелля з'явіўся ў музеі дзякуючы яго першаму дырэктару Антону Брадоўскаму. Ён быў калекцыянерам, інструктарам на курсах мастацкага вышывання і вялікім аматарам гэтага віду прыкладнога мастацтва. "Цудоўнымі вырабамі вышыўкі любаваліся ва ўсе часы, захапляючыся майстэрствам іх выканання, асаблівасцямі мастацкіх стыляў, што адлюстроўвалі густы часу. Аднак гісторыка-эстэтычную значнасць вышыўкі ўсвядомілі толькі ў ХІХ стагоддзі. Тады яна і стала незвычайнай крыніцай збіральніцтва, а таксама атрымала самае шырокае распаўсюджанне ў сядзібным, гарадскім і прыдворным побыце", - расказалі ў абласным музеі.
Экспозіцыя будзе падзелена на некалькі тэматычных блокаў, кожны з якіх паслядоўна раскрывае галоўную ідэю выставы - паказ калекцыі праз адлюстраванне тэхналогіі вырабу, знаёмства са стылістычнымі асаблівасцямі, арнаментамі і дэкаратыўнымі матывамі, а таксама прызначэнне прадметаў канкрэтнага гістарычнага перыяду. "Вышываныя карціны, камінныя экраны, дамскія аксесуары, прадметы мужчынскага адзення і побыту дваран акунаюць у эпоху і сведчаць аб захапленнях і ладзе жыцця людзей таго часу. Акрамя вырабаў, вышываных бавоўнавымі і шарсцянымі ніткамі, наведвальнікі змогуць убачыць вышываныя бісерам сумачкі, кашалькі, паясы, цыбукі для трубак і іншыя прадметы", - дадалі ў ратушы.
Выстава будзе працаваць два месяцы.
