У пастаноўцы новага спектакля ўпершыню задзейнічалі кіраўніка заслужанага калектыву Беларусі народнага тэатра-студыі сучаснай харэаграфіі Дзіяну Юрчанка. Яна з'яўляецца харэографам многіх мерапрыемстваў "Славянскага базару ў Віцебску", а на гэты раз паспрабавала сябе ў якасці рэжысёра лялечнага спектакля, дадаўшы ў яго і танцавальныя элементы.
Для новай пастаноўкі быў узяты ўжо гатовы варыянт перакладу на беларускую мову твора Карнея Чукоўскага, зроблены пісьменнікам, паэтам і перакладчыкам Алесем Якімовічам. Тых, хто ведае гэты верш на памяць у рускай версіі, чакае нямала адкрыццяў.
Вядомая кожнаму з дзяцінства гісторыя паўстае перад гледачамі ў цікавай інтэрпрэтацыі і з'яўляецца ўрокам не толькі асабістай гігіены, але і экалагічна дружалюбных паводзін. Напрыклад, героі паказваюць, што нельга кідаць смецце міма урны, інакш кучы смецця могуць ажыць і пачаць праследаваць цябе. Ды і сустрэчу з мылам і мачалкай таксама не варта адкладаць на потым, а то яны паскардзяцца ўмывальнікаў начальніку, і той вельмі сур'ёзна пагаворыць з няўмытым дзіцем, што чарнейшае за камінара.
Ва ўстанове культуры расказалі, што прэм'еру рыхтавалі ў сціслы тэрмін, гэтак жа як і стваралі лялькі ў даволі паскораным рэжыме. Кіраўніцтва тэатра зрабіла стаўку на маладых артыстаў - выпускнікоў Віцебскага дзяржаўнага каледжа культуры і мастацтваў. Дзякуючы іх энергіі спектакль атрымаўся дынамічным, яркім і насычаным. У фінале нават можна пачуць рэп. Артысты таксама ўключылі ў пастаноўку элементы інтэрактыўных гульняў. Якія менавіта - пра гэта наведвальнікі "Лялькі" даведаюцца, калі пабываюць сёння на прэм'ерных паказах.
Новы спектакль увойдзе ў пастаянную праграму Беларускага тэатра лялек. Ва ўстанове культуры рэкамендуюць сачыць за афішай, каб не прапусціць яе.
