У склад Музея Марка Шагала ўваходзіць аднайменны Арт-цэнтр і мемарыяльны дом-музей, дзе жыў мастак з сусветным імем. "Установа культуры з'яўляецца адным з галоўных пунктаў прыцягнення турыстаў. У мінулым годзе ўпершыню за 30 гадоў дзейнасці Музея быў самы вялікі паток наведвальнікаў - больш як 55 тыс.", - расказала Ірына Воранава.
Са студзеня ў распараджэнне Музея Марка Шагала перадалі Віцебскі цэнтр сучаснага мастацтва (ВЦСМ) з Музеем гісторыі віцебскага народнага мастацкага вучылішча, выставачнай залай на вул. Белабародава, музычнай гасцінай на пр. Фрунзэ і Арт-прасторай на вул. Талстога, 7. Ірына Воранава адзначыла, што дзякуючы гэтым плошчам з'явіцца магчымасць перанакіраваць патокі турыстаў на новыя аб'екты.
"Музей гісторыі віцебскага народнага мастацкага вучылішча непасрэдна звязаны з дзейнасцю Марка Шагала ў якасці камісара па справах мастацтваў у Віцебскай губерні з 1918 па 1920 год. Цяпер там ідзе карэкціроўка зменных выставачных праектаў. Музей увайшоў у гэты год з юбілейнай датай - 105 гадоў УНОВІСу (скарачэнне ад "Сцвярджальнікі новага мастацтва". - Заўвага БЕЛТА), творчаму аб'яднанню, якое было арганізавана Казімірам Малевічам у лютым 1920 года. І ў рамках святкавання гэтай падзеі мы вязём у Віцебск амазонку рускага авангарда, "Віцебскую Джаконду" Веру Ермалаеву. Да дня горада, г.зн. у другой палове чэрвеня, мы прывязём яе ўпершыню ў Рэспубліку Беларусь. Яе работ няма ні ў адным беларускім музеі, яны нідзе не экспанаваліся, але хутка з'явяцца ў тым месцы, дзе яна была адной з выкладчыц, а некаторы час і дырэктарам вучылішча, і таксама ўдзельніцай творчага аб'яднання УНОВІС. Убачыць гэту выставу можна будзе да сярэдзіны жніўня", - адзначыла Ірына Воранава.
Яна дадала, што ў Арт-прасторы на Талстога, 7 пройдзе маштабная рэканструкцыя з капрамонтам.
