Цырымонія ўзнагароджання адбылася сёння ў Віцебскай абласной філармоніі. Уладзіміру Андрэйчанку ўручылі адпаведнае пасведчанне на ўрачыстым мерапрыемстве з нагоды ўшаноўвання лаўрэатаў прэміі "Чалавек года Віцебшчыны". Старшыня Палаты прадстаўнікоў у адпаведнасці з рашэннем Віцебскага аблвыканкама таксама быў узнагароджаны ганаровай граматай і знакам за заслугі ў развіцці Віцебскай вобласці.
Уладзімір Андрэйчанка ўзначальваў Віцебскі аблвыканкам з 1994 па 2008 год. Ён унёс вялікі ўклад у развіццё паўночнага рэгіёна і абласнога цэнтра. І сёння прадаўжае аказваць падтрымку вобласці, звяртаючы вялікую ўвагу на ўсе сферы эканомікі. Званне "Ганаровы грамадзянін горада Віцебска" старшыні Палаты прадстаўнікоў прысуджана ў адпаведнасці з сумесным рашэннем Віцебскага гарвыканкама і прэзідыума Віцебскага гарадскога Савета дэпутатаў.
"Нечакана і вельмі хвалююча, - сказаў спікер з трыбуны. - І, вядома, я дзякую за такую высокую ацэнку маёй працы. Але гэта не асабіста мая заслуга, гэта перш за ўсё заслуга жыхароў Віцебскай вобласці, горада Віцебска. Гэта калектыўная праца Віцебскага гарвыканкама, Віцебскага аблвыканкама, іх кіраўнікоў".
Ён дадаў, што вельмі важна, каб тыя добрыя справы, якія ў свой час былі зроблены (а зроблена вельмі шмат, і перш за ўсё пры падтрымцы Прэзідэнта краіны), мелі працяг. Уладзімір Андрэйчанка назваў шэраг аб'ектаў, пабудаваных пры падтрымцы кіраўніка дзяржавы. Сярод іх - анкалагічны дыспансэр, Лядовы палац, Цэнтральны спартыўны комплекс і многія іншыя.
"Гэта, вядома, заслуга перш за ўсё ўсіх жыхароў Віцебскай вобласці. І важна, што гэтыя добрыя справы сёння прадаўжаюцца. Кожны год нешта будуецца ў Віцебску, жылля шмат, аб'ектаў сацыяльна-культурнага прызначэння. Гэта значыць, што ў Віцебска вялікая будучыня", - падкрэсліў старшыня Палаты прадстаўнікоў.
