Рэжысёрам работы стаў Андрэй Жыгур, музычнае афармленне для яе падрыхтаваў Міхаіл Рудак. Сама ідэя пастаноўкі належыць вядучаму майстру сцэны Ніне Обухавай, а аўтарам п'есы выступіў Алесь Замкоўскі. Спектакль запрашае гледача ў імерсіўнае падарожжа па музеі-сядзібе Ільі Рэпіна "Здраўнёва" пад Віцебскам. Падзеі будуць разгортвацца ў пачатку ХХ стагоддзя - гэта гісторыі пра сям'ю мастака, яго творчыя пошукі і ўнутранае хваляванне. Сярод пытанняў, на якія абяцаюць адказаць артысты, - ці можа мастацтва для геніяльнага майстра быць вышэй за іншыя жыццёвыя каштоўнасці. Драматычны нарыс адназначна спадабаецца гледачам розных узростаў, ён разлічаны на аўдыторыю 12 гадоў і старэйшую.
У пастаноўцы заняты больш за дзясятак артыстаў Нацыянальнага акадэмічнага драматычнага тэатра імя Я.Коласа. Гэта Яўген Бераснеў, Алена Шарэпчанка, Вікторыя Шамардзіна, Алёна Чыстабаева, Дзмітрый Каваленка. Таксама ролі выконваюць заслужаны артыст Беларусі Вячаслаў Грушоў, Юрый Цвірка, Цімур Жусупаў, Антон Бараноўскі, Дзмітрый Філімоненкаў, Ксенія Камінская, Дар'я Французава, Раіса Грыбовіч і заслужаныя артысткі Рэспублікі Беларусь Галіна Букаціна і Таццяна Ліхачова.
"Здраўнёва", на тэрыторыі якога пройдуць прэм'ерныя паказы, лічыцца адным з культурных брэндаў Віцебска. Музей знаходзіцца за 16 км ад абласнога цэнтра. Рэпін купіў гэту зямлю ў 1892 годзе. Мастака натхнялі мясцовыя краявіды, яны дазвалялі адпачыць ад мітусні Санкт-Пецярбурга. Тут жывапісец стварыў свае вядомыя карціны, сярод якіх "Месячная ноч", "Паляўнічы", "Беларус", "На Заходняй Дзвіне. Усход сонца" і іншыя.
Пастаноўку "Ілья Рэпін. Здраўнёўскія замалёўкі" пакажуць 15 і 16 ліпеня ў 21.30. Ад'езд ад тэатра ў дні паказаў запланаваны на 21.00.
Да старту міжнароднага фестывалю мастацтваў "Славянскі базар у Віцебску" застаецца крыху больш за тыдзень. Форум пройдзе з 13 па 16 ліпеня, асобныя падзеі запланаваны да адкрыцця і пасля афіцыйнага закрыцця.
