Старшыня сельскага Савета дэпутатаў Міхаіл Шульга вельмі ўдзячны за навядзенне парадку ў Фарынаве работнікам Фарынаўскага ўчастка Ветрынскай жыллёва-камунальнай гаспадаркі. Дворнікі штодзень наводзяць чысціню, умелыя рабочыя дапамагаюць майстру ўчастка Раісе Чобат увасабляць у рэальнасць яе творчыя задумкі.
Раіса Паўлаўна прыйшла на працу ў 2002 годзе. Тады не надзялялася столькі, як зараз, увагі добраўпарадкаванню тэрыторыі вёскі. Але паступова сітуацыя пачала мяняцца. Упрыгожванне даволі вялікай па плошчы тэрыторыі цэнтра вёскі Фарынава пачалі з размяшчэння на ёй некалькіх пянькоў, якія прывезлі з лесу. "Не было грошай на добраўпарадкаванне, таму ўключылі фантазію, і вырашылі зрабіць архітэктурныя формы з дрэва", - расказала Раіса Паўлаўна. Пабудавалі масток, зрабілі "Лебядзінае возера", пасадзілі "Дрэва кахання". Потым з'явіліся лаўкі, домікі на курыных ножках, матрошкі, неваляшкі. Усё, што рабілі, фарбавалі ў яркія колеры. "Было вялікае жаданне ўпрыгожыць тэрыторыю. Выкарысталі сякеру, пілу і працалюбівыя рукі Пятра Горбача, Генадзя Мармурка і Валянціна Майдана..." – уступіў у размову Міхаіл Шульга.
Старшыня сельскага Савета дэпутатаў паказаў журнал па добраўпарадкаванні тэрыторый населеных пунктаў, у якім пазначана, якія мерапрыемствы па добраўпарадкаванні запланавалі арганізацыі, якія працуюць на тэрыторыі сельсавета, на бягучы год. Міхаіл Ігнатавіч расказаў, што прапаноўваў усім вырабіць па 2-3 новых архітэктурных формы.
Міхаіл Ігнатавіч расказаў, што за кожнай арганізацыяй замацавана свая клумба: за магазінам, аптэкай, поштай, сельвыканкамам, ФАПам і за Сельскім домам культуры – 4 клумбы. Кожны год існуе інтрыга: чый жа кветнік самы прыгожы? У выніку ў летнюю пару добра выглядаюць усе клумбы: Фарынава расцвітае рознымі краскамі!
Значную лепту ў прыгажосць вёскі штогод уносяць супрацоўнікі дзіцячага садка, школы, мясцовага лясніцтва, вакзала. Тэрыторыі гэтых устаноў заслугоўваюць самай высокай адзнакі за арыгінальнасць і творчы падыход да навядзення парадку на зямлі.
Многія гаспадары сядзіб трымаюць у парадку тэрыторыі сваіх двароў. Насадзілі кветак, вырабілі цікавыя архітэктурныя формы. Дагледжаны выгляд маюць іх дамы: пафарбаваныя, з прыгожымі дахамі. Сучасны выгляд надаюць вёсцы шматлікія бетонныя агароджы.
Такая агароджа ўстаноўлена і ў цэнтры вёскі. Яе пабудавалі за дзяржаўныя і ўласныя сродкі сяльчан, а пафарбавалі з дапамогай царквы. Агульнымі намаганнямі вёска набыла прыгожы выгляд.
Кіраўнік мясцовай сельскай улады паведаміў, што бетонныя агароджы ўстаноўлены і на 9 грамадзянскіх могілках на тэрыторыі сельсавета. На гэтыя мэты сяльчане самі збіралі грошы.
Штогод у Фарынаве прэміравалі руплівых гаспадароў у намінацыях "Лепшы двор", "Лепшы балкон", "Самы чысты пад'езд". Удзячнасць за працу на агульнае дабро будзе выказана і сёлета.
... Увесь бягучы тыдзень дворнікі наводзілі ў вёсцы парадак: зграбалі лісце, убіралі смецце. Заўтра, у суботу, да іх на кірмаш прыедуць госці з усяго Полацкага раёна. І Фарынава, як гаспадар і лепшы населены пункт Полаччыны, сустрэне іх ва ўсёй сваёй прыгажосці.
Аліна Бальшакова (тэкст і фота) "Полацкі веснік"
